Qazaqstandyqtardy «jasandy ıntellekt» pen krıptovalıýta arqyly aldaıtyn jańa shema anyqtaldy
ASTANA. KAZINFORM — Qazaqstan Ulttyq banki azamattardy ınternette keńinen taralyp jatqan jańa ınvestıtsııalyq alaıaqtyq shemalarynan saq bolýǵa úndedi.
Ulttyq banktiń málimetinshe, keıingi ýaqytta áleýmettik jelilerde, messendjerlerde jáne forýmdarda alaıaqtar ınvestıtsııalyq kompanııalardyń atynan jarnama taratyp júr. Olar «tokendelgen altynǵa», «joǵary tabysty jasandy ıntellekt jobalaryna» nemese «neırojeli negizindegi treıder-robottarǵa» aqsha salsa, kepildi tabysqa keneletinin aıtyp, adamdardy aldaıdy.
— Alaıaqtar ózderin qarjylyq keńesshi retinde tanystyryp, jalǵan ınvestıtsııalyq platformalarǵa nemese krıptovalıýta servısterine tirkelýdi usynady. Bul platformalarda tabys grafıkteri, mámileler tarıhy, jeke kabınet jáne qoldaý qyzmeti sııaqty elementter arqyly shynaıy ınvestıtsııalyq qyzmettiń kórinisi jasalady. Senimge kirý úshin olar keı jaǵdaıda az mólsherdegi «paıdany» shyǵaryp berýge múmkindik beredi. Keıin «erekshe usynys» nemese «tabystylyǵy joǵary ınvestıtsııa» degen jeleýmen iri kólemde aqsha salýǵa úgitteıdi. Paıdalanýshynyń shotyndaǵy qarajat kóbeıgen kezde aqshany sheship alý múmkin bolmaı qalady. Osydan keıin alaıaqtar salyq, komıssııa nemese saqtandyrý tólemderin talap etedi, — delingen habarlamada.
Ulttyq bank sondaı-aq alaıaqtardyń móri, qoly jáne ózge de derektemeleri bar jalǵan qujattardy paıdalanyp, áreketterine zańdylyq sıpat berýge tyrysatynyn eskertti. Qosymsha tólemderdi alǵan soń olar baılanysqa shyqpaı, paıdalanýshynyń akkaýntyn buǵattaıdy.
Osyǵan baılanysty Ulttyq bank qyzmetkerleri eshqashan aýdıo nemese beıneqońyraý shalmaıtynyn, jeke tulǵalardyń shottaryna qyzmet kórsetpeıtinin, ınvestıtsııa salýdy usynbaıtynyn jáne halyqpen aqshalaı esep aıyryspaıtynyn eske saldy.
Eske salaıyq, buǵan deıin Ulttyq antıfrod ortalyǵy 68 mlrd teńge kólemindegi alaıaqtyqtyń aldyn alǵanyn habarlaǵan edik.
