Otandastarymyzdy shet elde jumysqa ornalastyratyn agenttikter qyzmetin bir júıege keltirý qajet — Bektenov

ASTANA. KAZINFORM — Shet elderde Qazaqstan azamattaryn jumysqa ornalastyratyn jeke agenttikterdiń qyzmetin bir júıege keltirý qajet. Bul týraly Úkimet otyrysynda Premer-Mınıstr Oljas Bektenov aıtty.

«Qazirgi ýaqytta shetelde jumys istep jatqan nemese sonda jumysqa ornalasqysy keletin qazaqstandyqtar kóp. Bul olardyń eńbek qatynastaryn zańdastyrýdy, quqyqtaryn qorǵaýdy talap etedi. Olarǵa jalaqy tólemeý, medıtsınalyq qyzmet kórsetpeý, kelisimsharttar óreskel buzylǵan faktiler bizge belgili. Sondyqtan qazir tıisti úkimetaralyq kelisimderdi bekitý boıynsha jumystar júrgizilip jatyr. Qazirdiń ózinde shet elderde bizdiń azamattardy jumysqa ornalastyratyn jeke agenttikterdiń qyzmetin bir júıege keltirý qajet. Qazaqstandyqtar kelisimshart boıynsha senimdi kepildik alýǵa tıis», — dedi Úkimet basshysy.

Osy oraıda Oljas Bektenov Eńbek mınıstrligine atalǵan baǵytta keshendi sharalar qabyldaýdy tapsyrdy.

«Sonymen qatar shet memleketterde jumys istegisi keletinder úshin Kásiptik jáne tildik daıarlaý ortalyqtaryn ashýǵa bolady. Mysaly, olardy Shyǵys Qazaqstan, Túrkistan jáne Almaty oblystarynda ashý josparlanǵan. Osy óńirlerdiń ákimderi bul jumysty jedeldetýi qajet. Basqa óńirler de osy tájirıbeni paıdalanýyna bolady», — dedi ol.

Premer-Mınıstr qabyldanyp jatqan barlyq júıeli sharalardy iske asyrý sapaly jumyspen qamtýǵa jáne halyqtyń tabysyn arttyrýǵa yqpal etetindigin aıtty.

«Óńir ákimderine turaqty jumys oryndaryn qurýǵa basa nazar aýdaryp, jumysqa ornalastyrý jónindegi josparlardyń oryndalýyn jeke baqylaýǵa alýdy tapsyramyn», — dedi Úkimet basshysy.