Qazaqstandyqtardy aldap kelgen transulttyq qylmystyq top Armenııada ustaldy

ASTANA. KAZINFORM — Olar qazaqstandyqtarǵa qońyraý shalyp, iri ınvestıtsııalyq kompanııalarǵa aqsha salýdy usynǵan, dep habarlaıdy ІІM kıberqylmysqa qarsy is-qımyl departamentiniń bastyǵy Jandos Súıinbaı.

Qazaqstan ІІM kıberqylmysqa qarsy is-qımyl departamentiniń qyzmetkerleri Armenııanyń Tergeý komıtetiniń asa mańyzdy isterdi tergeý jónindegi bas basqarmasymen birlesip, jedel is-sharalardy ótkizý kezinde Erevanda alaıaqtardyń eki call-ortalyǵynyń áreketine tosqaýyl qoıdy.

— Qazaqstan men Eýropa elderiniń azamattaryna qatysty ınternet-alaıaqtyq jasaǵan transulttyq qylmystyq toptyń uıymdastyrýshylary men músheleri anyqtaldy. Olar qazaqstandyqtarǵa qońyraý shalyp, iri ınvestıtsııalyq kompanııalarǵa aqsha salýdy usynǵan. Tintý sharalary barysynda 70-ten astam kompıýterlik tehnıka, shamamen bir kılogramm altyn, 5 avtokólik, 30 myń AQSh dollary, Reseı rýblderi, grýzın larıi jáne krıptovalıýta ámııany tárkilendi, — dedi ІІM kıberqylmysqa qarsy is-qımyl departamentiniń bastyǵy Jandos Súıinbaı.

Arnaıy operatsııa kezinde Armenııa, Grýzııa, Iran, Sırııa jáne Lıvan azamattarynan quralǵan qylmystyq toptyń 41 múshesi ustaldy. Qazirgi ýaqytta armıan tarapy Qazaqstan ІІM kıberqylmysqa qarsy is-qımyl departamentimen birlesip, tergeý áreketterin jáne jedel-izdestirý is-sharalaryn júrgizýde. Olar jalpy mán-jaıdy, qosymsha epızodtardy, basqa da kúdiktilerdi, sondaı-aq Qazaqstan azamattaryna keltirilgen zalal somasyn anyqtaýǵa baǵyttalǵan.

Buǵan deıin Kıberpolıtsııa ınternet-alaıaqtyqqa arnalǵan jabdyqtary bar eki sheteldik azamatty ustaǵanyn jazǵan edik.