Qazaqstandyqtar jol sapasy týraly 19 myńnan astam shaǵym túsirgen
Kólik mınıstrligi avtojoldarǵa qatysty barlyq josparlanǵan jobalardy ýaqytyly iske asyrýy qajet. Bul týraly QR Premer-Mınıstri Álıhan Smaıylov jol sapasy týraly Úkimet otyrysynda aıtty, dep habarlaıdy Kazinform.
«Basty másele – jol qurylysynyń sapasyn qamtamasyz etý. Jol sapasynyń nasharlyǵy turǵyndardyń narazylyǵyna sebepshi bolyp otyr. Ásirese, sapasyz jóndeý jumystaryna qatysty aıtylyp jatqan syn kóp. Tek osy jyldyń ózinde memlekettik organdarǵa avtomobıl joldaryna qatysty 19 myńnan astam aryz-shaǵym kelip tústi», - dedi Premer-Mınıstr Úkimettiń búgingi otyrysynda.
Mysaly, jol azabyn tartqan Qostanaı oblysynyń turǵyndary Uzynkól stantsııasy men Troebratskoe aýyly arasyndaǵy ábden tozyp bitken jolǵa qatysty ujymdyq hat jazǵan. Bul jol osy óńirdi kórshiles Soltústik Qazaqstan oblysymen baılanystyrady jáne Reseıge qaraı tranzıttik jol bolyp sanalady. Bıyl Aqtóbe oblysynyń Juryn stantsııasy men Orqash aýyly arasynda qıyrshyq tas tóselmegen sapasyz jol salynǵan.
Al Taraz qalasynyń turǵyndary Qarasý shaǵyn aýdanynda 1 jyldan astam ýaqyt boıy bitpeı jatqan jol jóndeý jumystaryn aıaqtaýdy talap etip keledi. Mundaı mysaldar barlyq óńirde kóptep kezdesedi.
«Ákimdikter de jergilikti joldardyń sapasyna saraptama jasaý jumystaryn da durys júrgize almaı otyr. Keıbir óńirler qurylys-montajdaý jumystaryn tehnıkalyq qadaǵalaý tarapynan baqylaýsyz júrgizedi. Uzaq jyldar boıy jol salasynda sheshilmeı kelgen problemanyń biri – bıtým tapshylyǵy. Tapshylyqty ımport esebinen jabýǵa májbúr bolyp otyrmyz. Bıtým boıynsha paıdalaný tehnologııasy saqtalmaıdy. Bul da joldardyń sapasyna keri áserin tıgizip otyr», - dedi Á.Smaıylov.
Sonymen qatar ákimdikter qurylys jáne jol boıyndaǵy qyzmet kórsetý nysandarynyń jobalaryna arnalǵan jer ýchaskelerin berý ýaqytyn sozýda. Osy faktorlardyń barlyǵy salany damytýǵa kedergi bolyp otyr.
«Kólik mınıstrligi ákimdiktermen birlesip, avtomobıl joldaryna qatysty barlyq josparlanǵan jobalardy ýaqytyly iske asyrýy qajet. Kólik mınıstrligi men «Qazavtojol» kompanııasy bıtýmdy saqtaý ınfraqurylymyn qurý boıynsha shara qabyldaýy qajet. Sondaı-aq ákimdiktermen jáne jol aktıvteriniń ulttyq sapa ortalyǵymen birlesip, bıtým saqtaý jáne paıdalaný tehnologııasynyń saqtalýyn baqylaýy kerek. Aýyl sharýashylyǵy mınıstrligi Ekologııa mınıstrligimen jáne ákimdiktermen birlesip, qurylys jáne jol boıyndaǵy qyzmet kórsetý obektilerin keńeıtý jobalaryna jer ýchaskelerin berý tártibin ońaılatýdy pysyqtaýy kerek», - dedi Úkimet basshysy.
