Qazaqstandyqtar jol-kólik oqıǵasyn polıtsııasyz tirkeı alady
2024 jyldyń 1 qańtarynan bastap azamattar usaq jol-kólik oqıǵalary kezinde polıtsııanyń jáne sottyń qatysýynsyz jeńildetilgen tártipte saqtandyrýdy resimdeı alady. Bul úshin memleket «Eýrohattama» arnaıy mobıldi qosymshasyn ázirledi. Kazinform bul týraly Polisia.kz-ke silteme jasap habarlaıdy.
Qosymshanyń kómegimen júrgizýshiler ózderi jol-kólik oqıǵalary faktisin tirkep, saqtandyrý kompanııalaryna materıaldyq zalaldy óteýge ótinim beredi.
«Eýrohattama» arqyly jol-kólik oqıǵalaryn resimdeýdiń mindetti úsh sharty bar:
1) Jol-kólik oqıǵasyna eki kólik quraly ǵana qatysqan kezde;
2) Júrgizýshilerdiń qoldanystaǵy saqtandyrýy bolýy qajet. Sondaı-aq kim kináli, al kim zardap shegýshi ekeninde kelispeýshilikter bolmaǵan kezde;
3) Apat saldarynan densaýlyqqa zalal keltirilmese, al kólikke keltirilgen shyǵyn somasy 100 aılyq eseptik kórsetkishten aspasa, ol 369 myń teńge.
Osyndaı tártipte jol-kólik oqıǵasyn resimdeý úshin mobıldi telefonǵa «Eýrohattama» qosymshasyn qosyp alyp, tirkelý rásimin júrgizip, oqıǵanyń foto jáne beınematerıaldaryn salý kerek. Qosymshany tıimdi paıdalaný maqsatynda jol-kólik oqıǵasynyń qatysýshylary jaqyn jerdegi polıtsııa narıadyna júgine alady, olar ony paıdalaný kezinde kómek kórsetedi.
«Eýrohattamanyń» artyqshylyǵy nede?
Birinshiden. Azamattar usaq jol-kólik oqıǵalaryn resimdeý úshin polıtsııany kútpeıdi, osylaısha joldardaǵy keptelis jaǵdaılary tómendeıdi.
Ekinshiden. Jeńildetilgen tártippen tirkelgen jol-kólik oqıǵasy kezinde júrgizýshiler ákimshilik jaýapkershilikke tartylmaıdy.
Úshinshiden. Saqtandyrý tólemderiniń merzimi qysqarady. Eger buryn osynyń bári 30-dan 90 kúnge deıin ýaqytty alsa, qazir hattama tirkeý sátinen bastap tólemdi alýǵa shamamen bes kún ketedi.
«Júrgizýshilerdi jol júrisi qaǵıdalaryn saqtaýǵa jáne jol-kólik oqıǵalaryn boldyrmaýǵa shaqyramyz», – dedi QR ІІM ÁPK erekshe tapsyrmalar jónindegi aǵa ınspektory Qýanysh Tilekbaev.
