Qazaqstandyqtar jylýǵa qansha tóleıdi
ASTANA. KAZINFORM – Qazaqstan qalalaryndaǵy jylý baǵasynda edáýir aıyrmashylyq tirkeldi. Keı óńirde gıgakalorııasy 4 myń teńgege jetpeıdi, al keıbirinde 10 myń teńge bolyp tur. Baǵany Kazinform agenttiginiń tilshisi salystyrdy.
Baǵaǵa tek klımat, energııa kózin qaıdan alyp otyrǵany emes, esepteý qurylǵysy, jeliniń jaǵdaıy jáne jylýmen qamtý kompanııasynyń saıasaty áser etedi. Bıyl qańtar aıyna qaraǵanda kóp óńirde jylý baǵasy kóterildi, al keıbirinde sol kúıi ózgerissiz qaldy. Baǵany salystyrǵan kezde 1 gıgakalorııasynyń quny qansha ekeni esepke alyndy.
Elimizdiń ońtústigindegi qalalarda baǵa ádettegideı tómen. Túrkistanda 1 Gkal jylý quny 3 207 teńge, Qonaevta 3 532 teńge jáne Qyzylordada 3 589 teńge.
Jezqazǵanda 3 663 teńge, al esepteý qurylǵysy bolsa 2 906 teńge.
Elimizdiń astanasynda esepteý qurylǵysy bolsa jylý quny - 3 929 teńge/Gkal, al eger qurylǵy bolmasa - 4 727 teńge/Gkal.
Taldyqorǵan qalasynda esepteý qurylǵysy bolmasy gıgakalorııasy 4 864 teńge, eger qurylǵy qondyrsa 3 635 teńge esepteledi.
Óskemen qalasynda jergilikti turǵyndar gıgakalorııasyna 5 116 teńge tólep júr. Al eger esepteý qurylǵysy bolsa gıgakalorııasy 3 641 teńgege túsedi.
Aqtóbe qalasynda baǵa 5 myń teńgeden joǵary. Jylý tarıfi gıgakalorııasyna – 5211 teńge.
Aqtaý qalasynda tarıf ózgerdi. Baǵa bıyl tamyz aıynda kóterilip, aýdany 100 sharshy metrge jetpeıtin páter turǵyndary esepteý qurylǵysy bolmasa gıgakalorııasyna 5 400 teńge tólep júr.
Kókshetaý qalasynda baǵa orta eseppen 23% teńge ósti. Eger esepteý qurylǵysy bolmasa turǵyndar gıgakalorııasyna 5 507 teńge, al bolsa 2 529 teńge tóleıdi.
Pavlodarda jylý 12,7% kóterildi. Esepteý qurylǵysy bolmasa 1 Gkal - 5 470 teńge ( QQS qosqanda).
Qaraǵandyda jeke tulǵalar jylýǵa 5 537 teńge tóleıdi.
Qostanaıda 2025 jyldyń 1 qazanynan bastap jylý tarıfi 6 301 teńge boldy. Eger esepteý qurylǵysy bolsa 5 069 teńge tóleıdi.
Tarazda QQS qosqanda turǵyndar úshin tarıf - 6 258 teńge/1 Gkal. Eger esepteý qurylǵysy bolsa – 4985 teńge.
Semeıde 2025 jyldyń 1shildesinen bastap tarıf ózgerdi jáne 2026 jyldyń 30 shildesine deıin esepteý qurylǵysynyń bar-joǵyna qaraı eki túrli tólem saqtalady. Eger esepteý qurylǵysy bolmasa 1 Gkal - 6 362 teńge (eger qurylǵy bolsa 5031 teńge/Gkal).
Oral qalasynan bastap tarıf joǵary. Munda jylý esepteý qurylǵysy bolsa da, bolmasa da gıgakalorııasyna - 6 946 teńge.
Shymkentte tamyz aıynan bastap jylý tarıfi 1 gıgakalorııasyna 7 230 teńge dep bekitildi.
Atyraýda esepteý qurylǵysy bolmasa jeke tulǵalar gıgakalorııasyna 7 470 teńge teńge, al eger eseptegish qurylǵy qondyrsa 6 021 teńge tóleıdi. Tozyǵy jetken jáne apatty úıde turatyn adamdar 1 Gkal-ǵa 6 225 teńge tóleıdi.
Petropavl qalasynda jylý tarıfi 2025 jyldyń 1 qańtarynda ózgerdi. Eger úıde esepteý qurylǵysy bolmasa Gkal-na 7 891 teńge esepteledi. Al qurylǵy bolsa tarıf - 6038 teńge.
Jylý tarıfi Almaty qalasynda qymbat. Munda turǵyndar jylýdyń gıgakalorııasyna 8403 teńge tóleıdi. Eger úıde esepteý qurylǵysy bolmasa 10 084 teńge suraıdy. Esepteý qurylǵysy bolsa tarıf - 8 248 teńge. Eski, apatty úıdiń turǵyndary esepteý qurylǵysyn tehnıkalyq talapqa saı qondyra almaıdy. Olar úshin tarıf Gkal-na 8403 teńge.
Aıta keteıik, Almatyda qazir «aqyldy» júıe engizilip jatyr. Jylý qysymy men temperatýrasyna monıtorıng jasap, qaı jerden aqaý ketkenin birden kórýge bolady.