Qazaqstandyqtar jylqy etin tutyný boıynsha rekord jańartty
ASTANA. KAZINFORM – Byltyrǵy tórtinshi toqsanda Qazaqstanda bir adamǵa shaqqandaǵy jylqy etin tutyný kólemi 2,35 kg boldy. Bul – sońǵy 15 jyldaǵy kez kelgen toqsan boıynsha tirkelgen eń joǵary kórsetkish, dep habarlaıdy DATA HUB.
Ulttyq statıstıka bıýrosynyń iriktemeli saýalnamasy negizinde júrgizilgen esepteýlerge sáıkes, bul kórsetkish 2024 jyldyń osy kezeńimen salystyrǵanda 10,7%-ǵa artqan.
Sarapshylardyń málimetinshe, jylqy etin tutyný maýsymdyq sıpatqa ıe. Ádette eń joǵary kórsetkishter jyldyń eń sýyq kezeńderi – birinshi jáne tórtinshi toqsandarǵa keledi. Sońǵy tórt jylda tarıhı rekordtar dál qazan-jeltoqsan aılarynda jańaryp otyr.
IV toqsanda jan basyna shaqqandaǵy jylqy eti tutyný ósimi jalpy et jáne et ónimderin tutyný qarqynynan áldeqaıda joǵary boldy. Jalpy et tutyný jyldyq esepte nebári 0,6%-ǵa ósip, bir adamǵa shaqqanda orta eseppen 21,96 kg boldy.
2025 jyldyń qorytyndysynda bir qazaqstandyq orta eseppen 7,63 kg jylqy etin tutynǵan. Bul – ótken jylmen salystyrǵanda 7%-ǵa kóp jáne keminde sońǵy 15 jyldaǵy eń joǵary deńgeı. Jalpy et tutyný kólemi de rekordtyq kórsetkishke jetip, bir adamǵa 84,4 kg boldy. Alaıda ósim qarqyny salystyrmaly túrde tómen – 1,9%.
Bul derekter qazaqstandyqtardyń et ratsıonynyń qurylymy ózgerip jatqanyn kórsetedi. 2025 jyly jylqy etiniń úlesi jalpy et tutynýdyń 9%-yna jetip, bir jylda 0,5 paıyzdyq tarmaqqa artty.
Al basqa et túrleriniń úlesi azaıǵan:
– sıyr eti – 0,9 p.t. tómendep, 30% boldy
– qoı eti – 0,4 p.t. tómendep, 6% boldy
– shoshqa eti – 0,2%-ǵa azaıyp, 3,8% boldy
Sonymen qatar taýyq etiniń úlesi azdap ósip, 6,6%-ǵa jetti (+0,1 p.t.).
Mamandardyń pikirinshe, tutyný qurylymyndaǵy ózgerister baǵanyń ósýimen baılanysty bolýy múmkin. 2025 jyly sıyr eti 32,1%-ǵa, qoı eti 28,8%-ǵa qymbattaǵan. Al jylqy eti 17,3%-ǵa, qus eti 10,7%-ǵa ǵana ósken.
Buǵan deıin Kazinform Qazaqstan qalalaryndaǵy jylqy etiniń baǵasyna taldaý jasaǵan bolatyn.
