Qazaqstandyqtar jemqorlyq týraly habarlaǵany úshin 15,7 mln teńgege deıin syıaqy ala alady

ASTANA. KAZINFORM – Qazaqstandyqtar sybaılas jemqorlyq faktileri týraly habarlaǵany úshin syıaqy alady. 

Búgin — halyqaralyq ınformator kúni. Bul habar jetkizýshilerdiń qoǵamǵa qosqan mańyzdy úlesin atap ótetin data. Maqsat — adamdardy únsiz qalmaı, jemqorlyqqa, alaıaqtyqqa, halyq densaýlyǵyna jáne qorshaǵan ortaǵa tónetin qaýipterge qarsy belsendi kúresýge shaqyrý.

Qoǵamdy jıi alańdatatyn kúrdeli máseleniń biri — sybaılas jemqorlyq. Memleket basshysynyń tapsyrmasymen Sybaılas jemqorlyqqa qarsy is-qımyl agenttigi qoǵamda «Zań men tártip» qaǵıdattaryn ilgeriletý baǵytyndaǵy jumysty jalǵastyryp jatyr. Sybaılas jemqorlyqqa qarsy tıimdi jumys tek halyqtyń belsendi qatysýynyń arqasynda múmkin. Osy oraıda Sybaılas jemqorlyqqa qarsy is-qımyl agenttigi túrli baılanys arnalary arqyly ashyqtyq qaǵıdatyn iske asyrýda.

Aıta ketsek, sybaılas jemqorlyqqa qarsy qyzmettiń Call-ortalyǵy táýlik boıy jumys isteıdi, azamattarǵa tegin aqparattyq-konsýltatsııalyq qoldaý kórsetedi.

Operatorlar agenttiktiń qyzmeti týraly suraqtarǵa jaýap beredi, sybaılas jemqorlyqqa qarsy máseleler boıynsha shaǵymdardy, usynystar men pikirlerdi qabyldaıdy.

Ortalyq bolǵan nemese josparlanyp jatqan sybaılas jemqorlyq faktilerdi táýlik boıy qabyldaıdy. Sybaılas jemqorlyq qarsy is-qımyl agenttigi operatory quqyq buzýshylyq jasady degen kúdik týraly qońyraý túsken kezde abonentti habarlamaǵa tirkeıtin jáne jedel shara qabyldaıtyn agenttiktiń kezekshi ofıtserimen baılanystyrady. Osylaısha, árbir habarlama ýaqtyly tekseriledi. Jetkilikti negiz bolǵan jaǵdaıda sotqa deıingi tergeý bastalady.

Byltyr Call-ortalyqqa 26 myńnan astam ótinish tústi, sybaılas jemqorlyqqa qarsy qyzmet máseleleri boıynsha 5,8 myńnan keńes berildi jáne sybaılas jemqorlyq quqyq buzýshylyq belgileri bar 862 habarlama jetkizildi. Call-ortalyqqa túsken habarlamalardyń nátıjeleri boıynsha ashylǵan qylmystyq isterdiń sany artyp keledi. 

Sybaılas jemqorlyq quqyq buzýshylyq faktisi týraly habarlaǵan nemese sybaılas jemqorlyqqa qarsy is-qımylǵa ózge de jolmen járdem kórsetetin adamdarǵa, eger kináli adamǵa qatysty sot qaýlysy nemese aıyptaý úkimi zańdy kúshine engen jaǵdaıda, birjolǵy aqshalaı syıaqy tólenedi.

Syıaqy qaǵıdalary reglamenttelgen jáne sybaılas jemqorlyqqa tózbeýshilikti qalyptastyrý, azamattyq qoǵamdy oǵan qarsy kúreske tartý jolyndaǵy yntalandyrýshy tetik. 

Syıaqynyń kólemi 10%-ǵa deıin jáne 4 myń aılyq eseptik kórsetkishten aspaıdy. Naqty aıtqanda, sybaılas jemqorlyq zań buzýshylyqtar týraly senimdi aqparat bergeni úshin 15,7 mln teńgege deıin syıaqy kózdelgen.

Ótken jyly Sybaılas jemqorlyqqa qarsy qyzmet jalpy somasy 35,5 mln teńgege 104 azamatqa syıaqy berdi, onyń ishinde 38 memlekettik qyzmetshi gramotalarmen marapattaldy.

Ortalyqqa kóbine qandaı habarlamalar kelip túsedi? 

— qylmystyq jáne ákimshilik jaýaptylyqqa tartpaǵany úshin para alý;
— ókilettigin asyra paıdalaný;
— memlekettik satyp alý salasyndaǵy zań buzýshylyqtar;
— laýazymdy tulǵalardyń basqa da zańsyz áreketteri.

Sybaılas jemqorlyq faktileri týraly habarlap, syıaqy alǵan azamattardyń deni Qaraǵandy, Aqtóbe jáne Batys Qazaqstan oblysynda tirkeldi, atalǵan óńirlerde 6 adamnan 10 adamǵa deıin syıaqy aldy.

Memlekettik qyzmetkerler arasynda da jemqorlyq faktileri týraly habarlamany der kezinde jetkizý jaıttary artyp keledi

Mysaly, Shymkent qalasynda 6 mln teńge, ıaǵnı para somasynyń 10%-na «T» jáne «B» azamattarynyń qylmystyq is-áreketiniń jolyn kesýge kómekteskeni úshin «B» azamaty syıaqy aldy.

Astana qalasy boıynsha departamenti 3 mln teńge somasyna polıtsııa qyzmetkerlerine para berýge ıtermelegen eki azamatqa qatysty sybaılas jemqorlyq týraly habarlaǵany úshin «T» azamatyna syıaqy berdi.

Eń bastysy, sybaılas jemqorlyqqa qarsy qyzmet aqparat berýshilerdiń qupııalylyǵyn tolyq qamtamasyz etedi. Osyǵan maqsatta 2023 jylǵy 3 qańtardan bastap atalǵan sanattaǵy azamattardy qorǵaýdyń keshendi baǵdarlamasy qabyldandy. Endi sybaılas jemqorlyq týraly habarlaǵan adamdarǵa qatysty fızıkalyq qol suǵylmaýshylyq ǵana emes, sonymen qatar qupııa aqparatty jáne olardyń eńbek quqyqtaryn qorǵaý sharalary kúsheıtildi. Osylaısha sybaılas jemqorlyq týraly habarlaǵan adamdardy komıssııa quramynda Sybaılas jemqorlyqqa qarsy qyzmet qyzmetkeriniń qatysýynsyz tártiptik jaýapkershilikke tartýǵa, jumystan shyǵarýǵa nemese basqa laýazymǵa aýystyrýǵa bolmaıdy. Al sybaılas jemqorlyq týraly habarlaǵan adamdar týraly qupııa aqparat jarııa etilgen jaǵdaıda qylmystyq jaýapkershilik kózdelgen.

Eske sala ketsek, sybaılas jemqorlyq faktilerine tózbeýshilikti arttyrý, paraqorlyqqa beı-jaı qaramaý ádetin qalyptastyrý maqsatynda Antıkor jedel habarlaý úshin 1424 nómirli WhatsApp-chat-botyn iske qosty. Ol úshin 8 777 000 1424 nómirine habarlama jiberý jetkilikti.

WhatsApp chat-bot Antıkor 1424 arqyly ne isteýge bolady?

Sybaılas jemqorlyq faktileri týraly habarlaý; 

Sybaılas jemqorlyqqa qarsy is-qımyl máseleleri boıynsha keńes alý; 

— Habarlama men ony habarlaǵan adamnyń qupııalylyǵyna kepildik beriledi. Barlyq habarlama mindetti túrde qaralady jáne quqyq buzýshylyqtar anyqtalǵan jaǵdaıda qoldanystaǵy zańnamaǵa sáıkes shara qabyldanady. Alaıda, sybaılas jemqorlyq týraly jalǵan habarlaý qylmystyq jaýaptylyqqa ákep soǵatynyn eske salamyz, - dep eskertedi Antıkor. 

Aıta ketsek, birer kún buryn Memlekettik keńesshi Erlan Qarınniń tóraǵalyǵymen Qazaqstan Respýblıkasy Prezıdenti janyndaǵy Sybaılas jemqorlyqqa qarsy is-qımyl máseleleri jónindegi komıssııanyń otyrysy ótti.  

Memlekettik keńesshi Keshendi jospardyń tıisti tarmaqtaryn sapaly oryndaýdyń mańyzdylyǵyna nazar aýdardy. Sondaı-aq kóleńkeli ekonomıkaǵa qarsy is-qımyl salasyndaǵy jańa baǵdarlamalyq qujattardy daıyndaý kezinde taldamalyq jumysty kúsheıtýdiń ózektiligine toqtaldy.