Qazaqstandyqtar jeke kýálikti qalaı onlaın ala alady
ASTANA.KAZINFORM – Qazaqstandyqtar endi jańa jeke kýálikti onlaın ala alady.
Jeke kýálikti endi tolyqtaı onlaın rásimdeýge bolady. eGov.kz portalynda jáne eGov Mobile mobıldi qosymshasynda qujatty qashyqtan qaıta rásimdeýge múmkindik beretin pılottyq joba iske qosyldy. Bastamany Tsıfrlyq damý, ınnovatsııalar jáne aeroǵarysh ónerkásibi mınıstrligi men Іshki ister mınıstrligi birlesip júzege asyrdy.
- Mobıldi qosymsha arqyly ótinim berý úshin qosymshada avtorızatsııadan ótý, tıisti qyzmetti tańdap, bıometrııalyq sáıkestendirýden ótý, qajetti derekterdi toltyrý, qujatty alý ornyn kórsetý, memlekettik baj salyǵyn tóleý jáne ótinimdi Face/Touch ID arqyly rastaý qajet. Bul qyzmetti tek jeke kýálik ıesi ǵana ala alady. Basqa adamnyń atynan, tipti senimhat nemese qamqorshylyq negizinde de ótinim berý múmkin emes. Jeke kýálikti onlaın túrde tek onyń qoldanylý merzimi aıaqtalǵan jaǵdaıda ǵana aýystyrýǵa bolady – qujat merzimi aıaqtalǵanǵa deıin 30 kún buryn nemese merzimi ótkennen keıin 10 kún ishinde. Jańa jeke kýálikti ótinish berýshi aldyn ala kórsetken tirkeý pýnktinen alýǵa bolady. Qujatty daıyndaýdyń standartty merzimi – 15 jumys kúni, - delingen eGov.kz habarlamasynda.
Qazaqstandyqtar jeke kýálikti onlaın aýystyra alatynyn jazǵan bolatynbyz.