Qazaqstandyqtar jeke derekteri taratylsa, ótemaqy ala alady

ASTANA. KAZINFORM — Kıbersaqtandyrý jeke derekterdiń taralýynan zardap shekken azamattarǵa saqtandyrý tólemin alýǵa múmkindik beredi. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrliginiń Aqparattyq qaýipsizdik komıtetiniń tóraǵasy Rýslan Ábdihalyqov málim etti. 

Vedomstvo jeke derekterdiń taralý jaǵdaılary, derekterdiń taralýyna jol bergen kompanııalar jáne tikeleı jarııalanǵan jeke derekter týraly aqparatty qamtıtyn biryńǵaı ortalyqtandyrylǵan derekter bazasyn qurýdy josparlap otyr. Sonymen qatar, zardap shekken azamattarǵa jeke derekteri taralǵany úshin ótemaqy alý múmkindigi qarastyrylmaq.

— Kıbersaqtandyrý boıynsha bul bastamany qolǵa alamyz, áńgime aıyppuldy kóbeıtý týraly bolyp otyr. Memleket jeke derekterdiń taralýyna jol bergenderge salatyn aıyppuldy ulǵaıtady. Osy oraıda azamattardan oryndy suraq týyndaıdy «Azamattyń derekteri taralǵany úshin qandaı ótemaqy aldy? Qazir aıyppul memleket kirisine túsedi, al azamattar eshteńe almaıdy. Kıbersaqtandyrý protsesi bireýdiń kinásinen jeke derekteri joǵalǵan azamattyń tikeleı saqtandyrý tólemin alýyna múmkindik beredi. Bul óte mańyzdy másele, azamattar osy múmkindikti belsendi paıdalanady dep oılaımyn, — dedi Rýslan Ábdihalyqov ortalyq kommýnıkatsııalar qyzmeti alańynda ótken baspasóz máslıhatynda.

Buǵan deıin elimizde urlanǵan jeke derekterdiń reestri qurylatyny týraly habarlaǵan edik.