Qazaqstandyqtar jaıly mektepterdiń qurylysyna qatysa alady
ASTANA. KAZINFORM – 2024 jylǵy 29 sáýir men 10 mamyr aralyǵynda elimizdiń kez kelgen turǵyny «Jaıly mektep» ulttyq jobasy aıasynda salynyp jatqan bilim oshaqtary jobalarynyń sońǵy talqylaýyna qatysa alady.
Ulttyq jobanyń biryńǵaı operatory «Samruk-Kazyna Construction» AQ bilim berý keńistiginiń atmosferasy men úılesimdiligin sholýǵa múmkindik beretin 3D-úlgini usynyp otyr.
Onyń kómegimen jaıly mektepterdegi synyp, dáliz, vestıbıýl, sport zaldary jáne ashananyń qalaı rásimdeletinin tańdaýǵa qatysýǵa bolady.
Vırtýaldy saıahat oqýshylarǵa, ata-anaǵa, muǵalimder men qyzyǵýshylyq tanytqan azamattarǵa jaıly mektepterdiń ishki ıntererimen tanysyp, pikirin bildirýge múmkindik beredi. Odan bólek, qazaqstandyqtar arnaıy saýalnamaǵa qatysyp, usynystar bere alady.
Pikirler men usynystar bıyl 10 mamyrǵa deıin qabyldanady.
