Qazaqstandyqtar jańajyldyq dastarhan jaıý úshin qansha aqsha jumsaıdy
ASTANA. KAZINFORM — Olıve, balyq qosylǵan salat, manty men aqqaınar — jańajyldyq ústeldiń sáni. Kazinform agenttiginiń tilshisi Qazaqstanda merekelik dastarhan jaıýǵa qansha teńge jumsalatynyn eseptep shyqty.
Jańajyldyq basqosý tek as ta tók dastarhan emes, otbasyn biriktiretin salt. Ár úı salatty sándep, jemis-jıdekti ústelge qoıyp, dastarhandy mandarın men táttige toltyrady. Ortaǵa aqqaınar qoıyp, tún ortasynda Jańa jyldy qarsy alady.
Bul kúni adamdar ystyq tamaqty da asa úlken yntamen daıyndaıdy. Qazaqstandyqtardyń kóbi sol túni manty jasap, otbasy máre-sáre bolyp, toılatady.
Manty: ystyq tamaq
Manty jańajyldyq dastarhannan tabylatyn eń negizgi ystyq taǵamnyń biri. Onyń negizgi quramy — tartylǵan et. Óńirlerde kelisi orta eseppen ózge dámdeýishterdi qosqanda 3 000-5 900 teńge.
Elimiz boıynsha tartylǵan et baǵasy Oral qalasynda tómen, sáıkesinshe manty daıyndaý quny da arzanǵa túsedi. Qazaqstannyń batysyndaǵy Aqtaý men Atyraý qalalarynda da baǵa ózgege qaraǵanda tómen. Al ortalyq pen ońtústik jaqta, onyń ishinde Qaraǵandy, Shymkent pen Taraz qalalarynda baǵa ortasha qunnan joǵary. Sebebi tartylǵan et pen qamyr qospasynyń baǵasy joǵary.
Eń joǵary baǵa Almaty qalasynda tirkeldi. Munda bir keli tartylǵan et baǵasy ózge óńirlerge qaraǵanda joǵary. Sáıkesinshe manty daıyndaý kezinde de onyń quny óse túsedi.
Olıve
Salattyń quramy: jumyrtqa, kartop, tuzdalǵan qııar, jasyl burshaq, shujyq jáne maıonez.
«Kókónis bóliginiń» ortasha baǵasy — 1 300 teńge. Al shujyq, maıonez ben jumartqa baǵasy qalalarda ártúrli:
Arzany Oral, Qyzylorda, Aqtóbe qalalarynda. Mundaǵy baǵa — 2 800-3 800 teńge aralyǵynda.
Orta tusynda Óskemen, Semeı, Petropavl, Aqtaý, Almaty, Taldyqorǵan, Taraz qalalary tur. Baǵa — 3 000-4 100 teńge.
Astana, Qaraǵandy, Jezqazǵan, Qostanaı, Kókshetaý, Shymkent qalalarynda baǵa joǵary. Mundaǵy baǵa — 4 000-4 700 teńge.
Balyq qosylǵan salat
Jańajyldyq mázirge kirgen salattyń biri osy. Quramyna qajetti barlyq ónimdi qosqanda baǵa 2 200 teńgeden bastalyp, 3 500 teńgege deıin jetedi.
Nátıjesinde eń arzany Atyraý, Túrkistan, Semeı, Aqtóbe qalalarynda daıyndalady. Baǵa 2 200 teńgeden bastalady.
Ortasha baǵa: kóp qalada 2 500-3 000 tg aralyǵynda.
Qymbaty: Astana, Almaty, Aqtaýda — 3 000-3 500 tg.
Bul salatty daıyndaý olıve ázirlegenge qaraǵanda arzanǵa túsedi. Quramyndaǵy balyq pen maıonez baǵasy ǵana joǵary.
Aqqaınar men shyryn
Merekelik dastarhannyń ajyrasmas bóligi — aqqaınar. Baǵa elimizdiń qalalarynda ártúrli:
Arzany: Almatyda 1 700-2 400 tg, Aqtóbede 1 800-3 500 tg.
Ortasha: Taldykqorǵan, Atyraý, Shymkentte 2 500-4 000 tg.
Qymbaty: Astana, Kókshetaýda 3 000-10 000 tg.
Salqyn sýsyn men shyrynnyń lıtri — 500-2 000 tg.
Sonymen birge ústel ústine ydysty toltyryp jemis-jıdek qoıamyz. Elimizde alma men mandarınge orta eseppen 3 000 — 5 000 teńge jumsaımyz.
Oǵan qosa shaıǵa toqbasar, kondıterlik ónimder satyp alamyz. Tort baǵasy elimizde orta eseppen 5 000 — 7 000 teńge turady.
Qalalarda dastarhan jaıýǵa qansha jumsalady
Jańajyldyq dastarhan jaıýǵa qansha qajet ekenin bilý úshin manty, eki túrli salat (Olıve men balyq qosylǵan salat), aqqaınar, alkogolsiz sýsyn, jemis-jıdek pen tort baǵasy biriktirildi.
Oǵan jeńsik as, aqqaınardan da ózge ishimdik pen basqa taǵam túrlerin qospaı, tek negizgisiniń baǵasyn bildik. Sonymen birge dastarhanǵa qajetti taǵamnyń bári bir otbasyndaǵy tórt janǵa esepteldi.
Nátıjesinde qorytyndy baǵa mynadaı:
Eń arzany (Oral, Aqtóbe, Atyraý men Qyzylordada) — 21 000–26 000 teńge.
Bul qalalarda et baǵasy ózge óńirge qaraǵanda tómen, kókónis quny men shujyq arzan. Bul qarapaıym ǵana dastarhan jaıýǵa qajetti soma.
Ortasha baǵa (Óskemen, Semeı, Petropavl, Taldyqorǵan, Taraz, Aqtaý): 26 000–32 000 teńge.
Osy qalalarda tartylǵan et baǵasy joǵary bolyp tur. Salatqa qajetti zattar men sýsyn quny ósken. Sondyqtan dastarhan jaıý kezinde orshata qun tirkeldi.
Eń joǵary baǵa (Astana, Almaty, Qaraǵandy, Shymkent, Qostanaı, Kókshetaý, Jezqazǵan): 32 000–40 000 teńge.
Іri qalalar men elimizdiń astanasynda jańajyldyq dastarhan joıý quny qymbat. Sebebi tartylǵan et, balyq, kondıterlik ónim men ishimdik quny joǵary, sonymen birge munda qajetti zattarǵa tańdaý kóp.
Elimizdiń qalalaryndaǵy dastarhan joıý qunyn eseptep, keıbir óńirler arasynan eki ese aıyrmashylyqty kórdik. Aımaqtarda baǵa ártúrli bolǵanymen, kópshilik biz tańdaǵan salat, jemis pen kondıterlik ónimdi, ystyq tamaqty ústel ústine qoıady. Tek baǵa ózgeshe. Jańa jyl túni chektegi soma emes, kóńil-kúı, salt pen otbasyndaǵy ystyq yqylas qana mańyzdy ekenin kóremiz.
Buǵan deıin Qazaqstandaǵy shyrsha baǵasy týraly jazyldy.