Qazaqstandyqtar jalpyulttyq joba aıasynda 4 myńnan astam ıgi is jasady
ASTANA. KAZINFORM – Mádenıet jáne aqparat mınıstrligi Qazaqstanda ıgi ister marafony jalǵasyp jatqanyn málimdedi. Dástúrli jalpyulttyq joba qaıyrymdylyq mádenıeti men volonterlikti damytýǵa baǵyttalǵan.
«Igi ister marafony» jobasy aıasynda 4-10 qarasha aralyǵynda «Inklıýzııa» baǵytyndaǵy «Meıirimdilik aptalyǵy» ótip jatyr.
Mysaly, 5 qarashada Pavlodar oblysynda óner men shyǵarmashylyqty paıdalana otyryp, psıhoterapııa men psıhologııalyq túzetýge baǵyttalǵan «ART-terapııa» aktsııasy, 6-7 qarashada Almaty oblysynda múgedektigi bar adamdarǵa kómek pen qoldaý kórsetýge baǵyttalǵan «Júrekten júrekke» qaıyrymdylyq aktsııasy ótedi.
Búgingi tańda elimiz boıynsha 38 myńǵa jýyq azamat marafon aıasynda 4 myńnan astam ıgi ister jasady.
Marafon 2024 jylǵy 1 jeltoqsanǵa deıin jalǵasady.
Joba týraly tolyq aqparatty qazvolunteer.kz saıtynan alýǵa bolady.
