Qazaqstandyqtar zeınetaqy jınaǵyna tisin jáne balalaryn emdete alady

ASTANA. KAZINFORM — Densaýlyq saqtaý mınıstrliniń 2025 jylǵy 9 sáýirdegi buıryǵymen zeınetaqy jınaǵyn birjolǵy emdelýge paıdalaný qaǵıdalaryna ózgerister engizildi. 

Jańa qaǵıdaǵa sáıkes, endi qazaqstandyqtar zeınetaqy qoryndaǵy jınaqty stomatologııalyq qyzmet pen balalardy emdeýge paıdalana alady.

Stomatologııalyq qyzmet kórsetilgen kezde medıtsınalyq komıssııa quramyna emdeý josparyn, emge deıingi jáne em kezinde túsirilgen rentgen-sýretterdi zerdeleıtin, stomatologııalyq uıymnyń medıtsınalyq qyzmetke lıtsenzııasynyń bar-joǵyn tekseretin jáne dárigerlik-konsýltatsııalyq komıssııa qorytyndysyn daıyndaıtyn tis dárigeri kiredi.

Implantatsııa jasaǵan jaǵdaıda qyzmet alýshy nemese onyń zańdy ókili dárigerlik-konsýltatsııalyq komıssııa qorytyndysyn eki kezeńde alady, emge deıin jáne ortopedııalyq qurylymdardy ornatýdyń sońǵy kezeńi aldynda.

Implantatsııasyz protezdeý protsedýrasy kezinde qyzmet alýshy nemese onyń zańdy ókili dárigerlik-konsýltatsııalyq komıssııa qorytyndysyn eki kezeńde alady, ıaǵnı alynbaıtyn tis protezderin ornatý kezinde, protezdeý bastalǵanǵa deıin jáne olardy bekitý aldyndaǵy aldyn ala daıyndyq kezeńinde, al alynbaly tis protezderin ornatý kezinde, protezdeý bastalǵanǵa deıin jáne protezderdi ornatý aldynda.

Sondaı-aq, zeınetaqy jınaǵyn kámeletke tolmaǵan balalardyń birjolǵy emine de jumsaýǵa bolady.

Zeınetaqy jınaǵy esebinen emdelýge qatysty jańa qaǵıda bıyl 27 sáýirde kúshine enedi, tolyǵyraq siltemege ótip tanysýǵa bolady.

Ótken jyly zeınetaqy qoryndaǵy aqshany tis emdeýge jumsaýǵa tyıym salatyny týraly habarlaǵan edik.