Qazaqstandyqtar World Boxing basshylyǵyna úmitker Golovkındi qoldaý naýqanyn bastady

ASTANA. KAZINFORM – Áleýmettik jelide áıgili boksshy, álem chempıony jáne Qazaqstan Respýblıkasy Ulttyq olımpıadalyq komıtetiniń prezıdenti Gennadıı Golovkındi qoldaý maqsatynda aktsııa qarqyn aldy. 

Fleshmob Halyqaralyq World Boxing áýesqoı boks federatsııasy basshysyn aldaǵy saılaýyna oraılastyryldy. Bul is-shara 23 qarashada ótedi. Elimizdiń sport qaýymdastyǵy álemdik jáne otandyq bokstyń sımvoly dep baǵalanǵan úmitkerge belsendi túrde qoldaý bildiredi. 

Kazakhsporty instagram-akkaýntynda belgili sportshylar, bapkerler jáne jankúıerler «GGG-di qoldaý» heshtegimen beıneúndeý jarııalap, oǵan tilektestigin bildirip jatyr. Atalǵan habarlamada Golovkınniń sportty damytýǵa qosqan úlesin erekshe atap ótip, onyń joǵary bedeli men kóshbasshylyq qasıetin laıyqty baǵalady. Olardyń pikirinshe, bul halyqaralyq arenada álemdik bokstyń pozıtsııasyn nyǵaıtýǵa kómektesedi. 

– Gennadıı Golovkın – sport álemi jaqsy biletin esim. Biz onyń jetistigimen maqtanamyz, ol Qazaqstan men búkil álemdegi boksty jańa deńgeıde laıyqty túrde kórsete alady, - dep jazady jeli qoldanýshylary. 

Golovkın – álemdegi eń tanymal boksshylardyń biri, birneshe dúrkin álem chempıony jáne orta salmaqtaǵy kóptegen rekordtyń ıegeri. Qazaqstan UOK prezıdenti bolyp taǵaıyndalǵannan beri ol elimizdegi sport pen jas atletterdiń damýyna belsendi qoldaý kórsetip keledi.

World Boxing basshysynyń saılaý qorytyndysy 23 qarashada jarııalanady dep kútilip otyr. Qazaqstandyq sport qoǵamdastyǵy Golovkın uıymdy basqarady jáne álemdik arenada otandyq sportty dáripteýdi jalǵastyrady dep úmittenedi. 

Eske salsaq, budan buryn Gennadıı Golovkın World Boxing prezıdenti laýazymyna saılaýaldy baǵdarlamasyn tanystyrdy.