Qazaqstandyqtar VR tehnologııasy arqyly jańa mamandyqtardy úırene alady

ASTANA. KAZINFORM - QR Eńbek jáne halyqty áleýmettik qorǵaý mınıstrligi kadrlardy daıarlaý júıesine vırtýaldy shyndyq tehnologııalaryn engize bastady. Bul jumyssyz azamattarǵa teorııany ǵana emes, naqty jumys jaǵdaılaryna barynsha jaqyn tsıfrlyq ortada praktıkalyq daǵdylardy pysyqtaýǵa múmkindik beredi.

Mınıstrliktiń baspasóz qyzmetiniń habarlaýynsha, oqý protsesi eki kezeńge bólingen. Birinshi kezeńde qatysýshylar Skills Enbek tsıfrlyq platformasynda bes baǵyttyń bireýi boıynsha qashyqtyqtan onlaın-kýrstardan ótedi. Oqytý memlekettik jáne orys tilinde qoljetimdi.

Teorııalyq bólim aıaqtalǵannan keıin oqytý Mansap ortalyqtarda syrttaı formatta jalǵasady. Onda VR-shlemderdiń kómegimen qatysýshylar alǵan bilimderin bekitip, kásibı daǵdylardy naqty óndiristik ortaǵa jaqyn jaǵdaıda pysyqtaıdy. Baǵdarlamany aıaqtaǵan soń ár qatysýshyǵa sertıfıkat beriledi, ol platformadaǵy jeke kabınetinde avtomatty túrde kórsetiledi.

Pılottyq joba Qazaqstannyń bes qalasynda: Qonaev, Óskemen, Túrkistan, Shymkent jáne Astanada iske asyrylady. Elordada iske qosý bıylǵy jyldyń sáýir aıyna josparlanǵan, odan keıin baǵdarlamaǵa engen qalǵan óńirlerde kezeń-kezeńimen engiziledi.

- Mundaı zamanaýı tsıfrlyq sheshimder azamattardyń jumys berýshiler talaptaryna tezirek beıimdelýine jáne naryqqa daıyn praktıkalyq daǵdylarmen shyǵýyna kómektesedi, - delingen habarlamada.

Osyǵan deıin elordada oqýshylar VR arqyly bolashaq mamandyqtaryn synap kórgen bolatyn.