Qazaqstandyqtar Venesýelada ótetin saılaýda halyqaralyq baıqaýshy bolady
ASTANA. KAZINFORM — Qazaqstandyq delegatsııa 27 shildede Venesýelada ótetin jergilikti saılaýlardy baqylaý jónindegi Halyqaralyq mıssııaǵa qatysý úshin Karakas qalasyna keldi, dep habarlaıdy oqıǵa ornynan Kazinform tilshisi.
Bul sapar Venesýela tarapynan resmı shaqyrý boıynsha ótip jatyr jáne negizgi ishki ári halyqaralyq is-sharalarǵa qatysýdy qamtıdy.
Qazaqstandyqtar baıqaýshy mıssııasynyń quramyna endi. Bul mıssııaǵa AQSh, Reseı, Qyrǵyzstan, Shrı-Lanka, Latyn Amerıkasy elderi jáne basqa da memleketterdiń ókilderi de kirdi. Jalpy, 300-den 500-ge deıin sheteldik qatysýshy keledi dep kútiledi.
«Astana» Dıplomatııalyq klýbynyń prezıdenti Qaıyrbolat Sahmetov Karakasta ótetin aldaǵy is-sharalardyń mańyzdylyǵyn atap ótti
Qazaqstandyq delegatsııa quramynda Venesýelaǵa barǵan «Astana» Dıplomatııalyq klýbynyń prezıdenti Qaıyrbolat Sahmetov Karakasta ótetin aldaǵy is-sharalardyń erekshe mańyzyn atap ótti.
— Qazaqstandyqtardyń jergilikti saılaýlardy baqylaý jónindegi Halyqaralyq mıssııa quramyna enýi — venesýelalyq seriktester tarapynan joǵary senimniń kórinisi. Biz óńirlik saılaýlardy demokratııalyq ınstıtýttardyń damýynyń mańyzdy bóligi retinde qarastyramyz, al sammıtti — beıbitshilik pen turaqty damýdy qamtamasyz etý máseleleri boıynsha pikir almasýdyń biregeı alańy dep esepteımiz, — dedi ol.
Merler men mýnıtsıpaldyq keńes múshelerin saılaý barysyn baqylaýdan bólek, halyqaralyq delegatsııa músheleri 25 shildede Venesýela uıymdastyrǵan Beıbitshilik pen soǵysqa qarsy halyq sammıtine qatysady. Bul sammıt kópjaqtylyq qaǵıdattaryn nyǵaıtýǵa, halyqaralyq quqyqty qorǵaýǵa jáne jahandyq turaqsyzdyq jaǵdaıynda beıbitshilik mádenıetin ilgeriletýge baǵyttalǵan.
Buǵan deıin biz Japonııada parlamenttik saılaý ótkenin jáne bıleýshi koalıtsııanyń kópshilikti joǵaltqanyn habarlaǵan edik.
Eske sala keteıik, buǵan deıin AQSh Joǵarǵy soty 350 myń venesýelalyqty deportatsııalaýdy qoldaǵanyn jazǵan edik.