Qazaqstandyqtar veb-portal arqyly mýzeılerge vırtýaldy saıahat jasaı alady

ASTANA. KAZINFORM — Endi mýzeı súıer qaýym «E-Museum» vırtýaldy veb-portaly arqyly elimizdegi mýzeı eksponattaryn onlaın tamashalaı alady. 

— Sáýirde Qazaqstan mýzeıleriniń vırtýaldy jelisi — «E-Museum» veb-portalyn tanystyrý josparlanyp otyr. Bul platformada Qazaqstannyń 285 mýzeıiniń aqparaty, memlekettik mýzeıler qorynyń 65 myńnan astam eksponaty, 3D formattaǵy jádigerler qoljetimdi bolady. Buǵan qosa, mınıstrlik qazir Memleket basshysynyń Ulttyq quryltaıda bergen negizgi bastamalary men tapsyrmalaryn keńinen nasıhattaý maqsatynda medıa-jospar ázirledi, — dedi Mádenıet jáne aqparat mınıstri Aıda Balaeva elordada ótken ardagerler keńesiniń plenýmynda.

Sondaı-aq, vedomstvo basshysy ulttyq tsıfrlyq arhıv qurý barysyna toqtaldy.

— Memleket basshysy qazaqstandyq mádenıetti ǵalamdyq tsıfrlyq resýrstarda naqtyraq tanystyrý maqsatynda ulttyq tsıfrlyq arhıv qurýdy tapsyrdy. Bul joba arhıvtik qujattardy tsıfrlyq formatta saqtaýdy qamtamasyz etýge, ǵylymı zertteýler men elimizdiń barlyq azamattary úshin arhıv materıaldaryna qoljetimdilikti keńeıtýge baǵyttalǵan. Biz arhıvtik qujattar men óner týyndylaryn ulttyq tsıfrlyq arhıvke kóshirýdi josparlap otyrmyz, — deıdi ol.

Eske sala ketsek, byltyr Memleket basshysy elimizdegi eń basty úsh mýzeıge ulttyq mártebe beriletinin málimdegen edi.

Byltyrǵy derekke súıensek, elimizde 150-ge jýyq mýzeı bar.