Qazaqstandyqtar túıindeme toltyrǵanda qandaı qatelik jiberedi
ASTANA. KAZINFORM — Jumys izdeýdegi eń alǵashqy ári mańyzdy qadamnyń biri — durys jazylǵan túıindeme. Alaıda kóp jaǵdaıda úmitkerler tájirıbesin tolyq kórsete almaı, qarapaıym qatelikterdiń saldarynan suhbatqa shaqyrtý almaıdy. Ony qalaı saýatty toltyrý kerek? HR mamany Nargız Tańyrqaeva Jibek Joly telearnasynyń «Búgin Live» baǵdarlamasynda túsindirdi.
Onyń aıtýynsha, jumys berýshiler úshin úmitkerdiń burynǵy jumys oryndaryndaǵy naqty nátıje men tájirıbesi asa mańyzdy. Sondaı-aq talapqa tolyq sáıkes kelmese de, negizgi daǵdylary bar mamandarǵa basymdyq beriledi.
— Túıindemede burynǵy oryndardaǵy jumys nátıjesi mańyzdy. Daǵdysy 80 paıyzǵa sáıkes kelip tursa, HR soǵan basymdyq beredi. Sonymen qatar ıelengen sertıfıkattardy qosý qajet, — deıdi Nargız Tańyrqaeva.
Maman túıindemede kásibı tájirıbe ǵana emes, jeke qasıetter de nazarǵa alynatynyn atap ótti, ıaǵnı, qazirgi eńbek naryǵynda hard skills pen soft skills qatar baǵalanady.
— Túıindemede jeke bolmystary esepke alynady. Stresske tózimdilik te ról oınaıdy, — deıdi spıker.
HR mamanynyń sózinshe, jumysqa qabyldaý talaptary ár salada ártúrli bolady. Sondyqtan úmitker qujattaryn tańdalǵan baǵytqa qaraı beıimdegeni jón.
— Máselen, satý mamandarynyń jeke qabiletine qaraıdy. Basshylyq rólderde adamdarmen kommýnıkatsııa alǵa shyǵady, — deıdi ol.
Sonymen qatar túıindemeniń kólemi men qurylymy da erekshe mánge ıe. Uzaq ári retsiz jazylǵan aqparat jumys berýshiniń nazaryn tez joǵaltýy múmkin.
— Eń uzaq túıindeme joldy kesedi. 5-6 bet jazatyndar bar. Biraq ol 1-2 bet kóleminde bolǵany durys. Bastysy, qurylymy mańyzdy, — deıdi maman.
Onyń aıtýynsha, tek túıindememen shektelmeı, ony qosymsha motıvatsııalyq hatpen tolyqtyrǵan durys.
— Cover letter kerek. Mysaly, túıindememen hat qatar júredi. Onyń ishinde qandaı jospary bar, kompanııany damytýǵa qandaı úles qosa alady barlyǵy qamtylady. Osyndaı hat toltyrǵandar kóbine jumysqa tez ornalasyp ketedi, — dedi spıker.
Sondaı-aq ol stýdentter men eńbek jolyn endi bastap jatqan jastarǵa tájirıbesin kórsetýge keńes berdi. Sebebi jumys tájirıbesi az bolsa da, oqý kezindegi belsendilik pen naqty daǵdylar jumys berýshi úshin mańyzdy bolýy múmkin.
— Praktıkalyq jumystaryndaǵy kórsetkishterin, daǵdylaryn ashyp jazý kerek, — dedi ol.
Aıta keteıik, Qazaqstanda VR-tehnologııa arqyly jumyssyzdardy eńbek naryǵyna daıyndaý josparlanyp otyr.