Qazaqstandyqtar týǵan ýaqytyn jappaı izdeı bastady: buǵan ne sebep

Qyzyǵýshylyq neden týyndady

Sońǵy ýaqytta áleýmettik jelilerde adamnyń naqty týǵan ýaqytyn anyqtaýǵa qatysty jazbalar keńinen tarady. Osydan keıin kópshilik perzenthanalar men arhıvterge júginip, ózine qatysty derekterdi surata bastady. Keıin belgili bolǵandaı, mundaı belsendilik kezdeısoq emes. Sebebi bul aqparat nataldy karta jasaý úshin qajet.

Astrolog ári psıholog Maǵııa Túsibekovanyń aıtýynsha, nataldy kartalarǵa degen qyzyǵýshylyqtyń artýy tek astrologııanyń tanymal bolýymen ǵana emes, qoǵamnyń ózin tanýǵa degen suranysymen de baılanysty.

— Astrolog ári kóp jyldan beri tájirıbe jınaqtaǵan dıplomy, arnaıy bilimi bar psıholog retinde bul qyzyǵýshylyqtyń dál qazir nege kúsheıgenin jáne qoǵamda nelikten úlken rezonans týdyrǵanyn túsinemin. Bul qubylystyń artynda belgili bir psıhologııalyq ári áleýmettik úderis jatyr. Qazaqstanda nataldy kartalarǵa qyzyǵýshylyqtyń artýy zańdy qubylys dep esepteımin. Menińshe, bul jaı ǵana sánge aınalǵan áýestik emes, adamnyń ózin tanýǵa, óz múmkindikterin túsinýge jáne ishki baǵdaryn tabýǵa degen qoǵamdyq suranystyń kórinisi, — dedi maman.

Onyń aıtýynsha, nataldy kartany jasaý úshin adamnyń týǵan kúni men jeri ǵana emes, naqty týǵan ýaqyty da asa mańyzdy.

— Kásibı astrologııada nataldy karta — bul jaı ǵana zodıak belgisine negizdelgen juldyznama emes. Ol adamnyń týǵan kúni, týǵan jeri jáne dúnıege kelgen naqty ýaqyty negizinde jasalatyn jeke kartasy. Dál týǵan ýaqyt astrologııalyq úılerdiń ornalasýyn anyqtaıdy. Bul ómirdiń túrli salalaryn taldaýǵa, adamnyń minez-qulqyn, qabiletterin, ómirlik mindetteri men damý múmkindikterin baǵalaýǵa qoldanylady. Týǵan ýaqyttaǵy az ǵana qatelik kartany túsindirýge eleýli áser etip, jeke taldaý men boljamnyń dáldigin tómendetýi múmkin, — dep túsindirdi Maǵııa Túsibekova.

Osy sebepti nataldy kartasyn múmkindiginshe naqty jasatqysy keletin adamdar týǵan ýaqytyn naqtylaý úshin perzenthanalardyń arhıvterine jıi júgine bastaǵan.

— Adamdar jalpy sıpattaǵy juldyznamanyń jeke derekterge negizdelgen taldaýdan aıyrmashylyǵyn túsine bastady. Óz tájirıbemde sońǵy birneshe jylda týǵan ýaqytyn arhıvter men perzenthanalar arqyly naqtylaıtyn klıentterdiń aıtarlyqtaı kóbeıgenin baıqadym. Buryn mundaı jaǵdaılar sırek kezdesse, qazir turaqty úrdiske aınaldy. Óıtkeni bastapqy málimetterdiń dáldigi taldaýdyń sapasyna tikeleı áser etetinin adamdar jaqsy túsine bastady, — dedi ol.

Sarapshynyń pikirinshe, mundaı qyzyǵýshylyqtyń artýyna birneshe faktor yqpal etken.

— Biz qazir ekonomıkalyq jáne áleýmettik ózgerister jyldam júrip jatqan kezeńde ómir súrip jatyrmyz. Syrtqy orta turaqsyz bola túsken saıyn adam ishki tirek izdep, ózin tereńirek túsinýge umtylady, — deıdi maman.

Onyń aıtýynsha, búginde qazaqstandyqtardyń psıhologııaǵa, koýchıngke jáne ózin-ózi damytý tájirıbelerine qyzyǵýshylyǵy artyp keledi. Kópshilik úshin astrologııa ózin-ózi taldaýdyń bir quralyna aınalǵan.

— Psıhologııa turǵysynan alǵanda, nataldy kartalarǵa qyzyǵýshylyq — belgisizdik deńgeıi joǵary kezeńde psıhıkanyń tabıǵı beıimdelý reaktsııasy. Adam mazasyzdyqqa, turaqsyzdyqqa jáne bolashaqqa qatysty aıqyndyqtyń joqtyǵyna tap bolǵanda, ómirdiń mánin, baǵdaryn jáne jaǵdaıdy baqylaýda ustap otyrǵandaı sezimdi izdeı bastaıdy. Kópshilik úshin nataldy karta ózin jáne óz ómirin belgili bir júıege keltirýge kómektesetin qural retinde qabyldanady, — dep túsindirdi sarapshy.

Onyń baıqaýynsha, qazirgi kezde adamdardyń kóbi astrologtarǵa bolashaqty boljaý úshin emes, ózin jaqsyraq taný maqsatynda júginedi.

— Óz tájirıbemde adamdardyń bolashaqtaǵy oqıǵalardan buryn óziniń erekshelikterin, kúshti tustaryn jáne ishki múmkindikterin túsinýge kóbirek qyzyǵatynyn baıqap júrmin. Meniń oıymsha, búgingi qyzyǵýshylyqtyń negizgi sebebi — adamnyń ózin tereńirek tanyp, ómirinde bolyp jatqan oqıǵalardyń belgili bir zańdylyǵyn túsinýge degen umtylysy. Qysqasha aıtqanda, adamdar nataldy kartaǵa «Ne bolady?» degen suraqtan buryn «Men kimmin?» degen suraqtyń jaýabyn izdep keledi, — dedi ol.

Mamannyń pikirinshe, bul úrdistiń keń taralýyna áleýmettik jelilerdiń de yqpaly zor.

— Qazir astrologııaǵa qatysty kontent álem boıynsha mıllıondaǵan qaralym jınap jatyr. Nataldy kartalar, sáıkestik, ómirlik tsıklder men ózin taný taqyryptaryna qyzyǵýshylyq artyp keledi. Bul da atalǵan taqyrypqa degen suranysty kúsheıtip otyr, — dedi ol.

Psıholog Elına Kaehtına da nataldy kartalar men basqa da ezoterıkalyq tájirıbelerge degen qyzyǵýshylyqtyń artýyn áleýmettik jáne ekonomıkalyq turaqsyzdyqpen baılanystyrady.

— Daǵdarys kezeńinde adamdar kóbine qosymsha tirek izdep, mazasyzdyqpen kúresýdiń túrli joldaryn qarastyrady. Mundaı qubylystar tarıhta buryn da bolǵan. Mysaly, 1990-jyldary túrli dástúrli emes tájirıbeler tanymal bolsa, qazir astrologııa, nýmerologııa jáne nataldy kartalarǵa qyzyǵýshylyq kúsheıdi. Sonymen qatar keıbir taqyryptar aqparattyq keńistikte tez taralyp, qysqa ýaqytta trendke aınalady, — dedi psıholog.

Memlekettik organdar ne deıdi

Qazaqstanda týý týraly málimetter arnaıy aqparattyq júıede resmı túrde tirkeledi. Densaýlyq saqtaý mınıstrliginiń Respýblıkalyq elektrondyq densaýlyq saqtaý ortalyǵynyń málimetinshe, «Tirkelgen halyq regıstri» aqparattyq júıesinde № 041/ý nysanyndaǵy medıtsınalyq týý týraly kýálik tirkeledi. Onda balanyń týǵan kúnimen birge naqty týǵan ýaqyty da kórsetiledi.

Vedomstvonyń málimetinshe, mundaı derekterdi elektrondy túrde tirkeý 2012 jyldan beri júrgiziledi jáne jazbalar merzimsiz saqtalady.

Al medıtsınalyq týý týraly kýáliktiń qaǵaz nusqasy medıtsınalyq uıymda bes jyl boıy saqtalady. Bul merzim Densaýlyq saqtaý mınıstriniń 2020 jylǵy №QR DSM-175/2020 buıryǵymen belgilengen. Keıin qujattar belgilengen tártippen arhıvke ótkiziledi.

Mınıstrlik azamattyń ózi júgingen jaǵdaıda jáne zańda kózdelgen shekteýler bolmasa, týǵan ýaqyty týraly málimetti alýǵa quqyǵy bar ekenin atap ótti.

— Eger medıtsınalyq uıym qaıta uıymdastyrylǵan, taratylǵan nemese onyń arhıvi basqa mekemege berilgen bolsa, azamattarǵa oblystyń, respýblıkalyq mańyzy bar qalanyń nemese astananyń densaýlyq saqtaý basqarmasyna júginý usynylady. Onda arhıvtik medıtsınalyq qujattardyń qaıda saqtalǵany týraly aqparat beriledi, — dep habarlady Densaýlyq saqtaý mınıstrligi.

Al eGov portaly arqyly mundaı málimetti ázirge alý múmkin emes. Sebebi týǵan ýaqytyn berý boıynsha memlekettik qyzmet qarastyrylmaǵan.

Týǵan ýaqytyn izdeýge degen qyzyǵýshylyqtyń artqanyna qaramastan, Qazaqstanda bul málimetter resmı túrde saqtalady jáne azamattarǵa zańnamada belgilengen tártippen berilýi múmkin. Alaıda mundaı aqparatty ázirge eGov servısi arqyly alý múmkindigi joq.

Sonymen birge Densaýlyq saqtaý mınıstrligi azamattardyń týǵan ýaqyty týraly málimetti alý jónindegi ótinishteri boıynsha jeke statıstıka júrgizilmeıtinin habarlady. Sondyqtan búginde keńinen talqylanyp jatqan bul úrdistiń naqty aýqymyn resmı derektermen rastaý ázirge múmkin emes.

Buǵan deıin psıhologııa nege suranysqa ıe mamandyqqa aınalǵanyn jazǵanbyz.