Qazaqstandyqtar «TsON» qosymshasynda qandaı qyzmetti eń kóp paıdalandy
ASTANA. KAZINFORM — Jazda «TsON» qosymshasyna 281 myńnan astam ótinish túsken, dep habarlaıdy «Azamattarǵa arnalǵan úkimet» memlekettik korporatsııasynyń baspasóz qyzmeti.
Jazdyń úsh aıynda qazaqstandyqtar kúndelikti máselelerin sheshý úshin «TsON» qosymshasyn belsendi paıdalandy. Azamattar qosymsha arqyly elektrondy kezekke jazylyp, júrgizýshi kýáligin alýǵa arnalǵan emtıhandarǵa ótinish bergen, sondaı-aq basqa da memlekettik qyzmetterdi onlaın alǵan.
Búgin memlekettik korporatsııa «Qyzyqty statıstıka» aıdarynda jaz mezgilinde qazaqstandyqtar arasynda eń kóp suranysqa ıe bolǵan servısterdi usyndy.
Olardyń málimetinshe, úsh aıdyń qorytyndysy boıynsha «TsON» qosymshasynda eń kóp suranysqa ıe qyzmetterdiń qatarynda júrgizýshi kýáligin alǵash ret alýǵa ótinish berý, teorııalyq jáne praktıkalyq emtıhandarǵa jazylý bar.
— Atap aıtqanda, júrgizýshi kýáligin alǵash ret alý qyzmetine 281 489 ótinish berilgen. Al teorııalyq emtıhanǵa jazylý servısin 254 340 adam paıdalanǵan. Praktıkalyq emtıhanǵa jazylý qyzmetine jaz boıy 141 180 ótinish túsken. Osylaısha, júrgizýshi kýáligin alýǵa baılanysty úsh qyzmettiń ózine jaz aılarynda 677 myńnan astam ótinish berilgen, — delingen habarlamada.
«TsON» qosymshasy arqyly azamattar memlekettik qyzmetterdi qashyqtan alyp, HQKO-ǵa barý ýaqytyn aldyn ala josparlaı alady.
Buǵan deıin «Azamattarǵa arnalǵan úkimet» memlekettik korporatsııasy elimizdegi neke qııý statıstıkasyn jarııalady.
