Qazaqstandyqtar telemedıtsına arqyly qaı dárigerlerdiń keńesin ala alady
ASTANA. KAZINFORM – 2023 jyldan beri Qazaqstanda 11,8 mıllıonnan astam qashyqtyqtan medıtsınalyq qyzmet kórsetildi. Onyń aıasynda azamattar jalpy praktıka dárigerinen bastap kardıolog, onkolog jáne psıhıatrǵa deıingi beıindi mamandardyń keńesin ala alady. Bul týraly Ulttyq ǵylymı densaýlyq saqtaýdy damytý ortalyǵy basqarma tóraǵasynyń orynbasary Ádilet Tabarov aıtyp berdi.
Onyń málimetinshe, 2023 jyldan 2026 jyldyń alǵashqy jartysyna deıin respýblıka boıynsha barlyǵy 12 mln-ǵa jýyq qashyqtyqtan medıtsınalyq qyzmet kórsetilgen.
– Onyń ishinde 2023 jyly – 2 471 869, 2024 jyly – 3 212 965, 2025 jyly – 3 869 007, al 2026 jyldyń alty aıynda 2 293 096 qyzmet kórsetildi. Jyl qorytyndysy boıynsha bul kórsetkish taǵy shamamen 10%-ǵa artady degen boljam bar, - dedi ortalyqtyń basqarma tóraǵasynyń orynbasary Ádilet Tabarov.
Onyń aıtýynsha, qashyqtyqtan qandaı dárigerdiń keńesi kórsetiletini patsıenttiń dıagnozyna, medıtsınalyq kórsetilimderine, medıtsınalyq uıymdaǵy mamandar men tehnıkalyq múmkindikterge, sondaı-aq qoljetimdi qyzmet túrlerine baılanysty anyqtalady.
– Qajet bolǵan jaǵdaıda patsıentter telemedıtsına arqyly kardıolog, endokrınolog, nevrolog, akýsher-gınekolog, psıhıatr, onkolog, ońaltý dárigeri jáne basqa da beıindi mamandardyń keńesin ala alady, - dedi spıker.
Sonymen qosa, alǵashqy medıtsınalyq kómek kórsetý kezinde jalpy praktıka dárigeri, otbasylyq dáriger, ýchaskelik terapevt, ýchaskelik pedıatr, orta medıtsına qyzmetkeri, áleýmettik qyzmetker men psıholog qashyqtan konsýltatsııa júrgize alatynyn atap ótti.
Aıta keteıik, elimizde tsıfrlyq tehnologııalardy engizý jolǵa qoıylǵaly beri dárigerlerdiń júktemesi 40% azaıǵan.
