Qazaqstandyqtar tegin JI-zańger kómegine júgine alady

ASTANA. KAZINFORM — Qazaqstan azamattary budan bylaı LegalExpert.kz tegin onlaın servısi arqyly JI-zańger kómegine júginý múmkindigine ıe boldy.

Bul týraly «Jibek joly» telearnasyndaǵy «Búgin LIVE» baǵdarlamasynda Legal Al servısiniń aǵa ML ınjeneri Álibı Serikbaı aıtty. 

— LegalExpert.kz saıty — adamdardyń barlyq quqyqtyq suraqtaryna jaýap beretin jeke kómekshisi. Bárimiz biletindeı, zańger qyzmetine júginý úshin kóp qarjy kerek. Bir keńes alýdyń ózi 100-300 myń teńge shamasynda. Bizdiń jobanyń maqsaty — adamdardyń sotqa deıingi kezeńde týyndaǵan saýalyna jaýap taýyp berý, ıaǵnı zańgerge jolyqpas buryn belgili bir jaýaptar alýyna jol ashý, — dedi ol.

Sondaı-aq spıker saıtty qalaı qoldaný keregin de túsindirip ótti.

— Áýeli saıtqa kirip, tolyq tirkelý kerek. Sol jerde bárimiz qoldanatyn ChatGPT sekildi ınterfeıs bar. Sol jerge suraqty qoıýǵa bolady. Ol jerde jaýapty tolyqtyrý úshin JI naqtylaý suraqtaryn qoıýy múmkin, — dedi Álibı Serikbaı.

Belgili bolǵandaı, joba 1 shildeden beri pılottyq nusqada jumys istep jatyr. Qazirge deıin onda 4 myńnan asa qoldanýshy tirkelgen. 

Aıta keteıik, buǵan deıin qazaq tilin úıretetin JI-agent iske qosylatynyn jazǵan edik.