Qazaqstandyqtar Tájikstandaǵy balalar onkologııa ortalyǵyndaǵy naýqastarǵa jańa jyldyq mereke syılady
ASTANA.KAZINFORM — Jańa jyl qarsańynda «Shıfobahsh» ulttyq medıtsına ortalyǵynyń gematologııa bólimindegi kishkentaı naýqastar qamqor qazaqstandyqtardan syılyq aldy, dep habarlaıdy Kazinform agenttiginiń menshikti tilshisi.
Jańa jyl — ǵajaıyptar ýaqyty, maǵynaly ister jasap, armandardyń oryndalatynyn dáleldeý ýaqyty. Mereke qarsańynda Tájikstanda jumys isteıtin otandastarymyz balalarǵa jańa jyl ertegisiniń bir bóligin syılaýǵa tyrysty. Jınalǵan qarajat birneshe palatany jóndeýge, turmystyq tehnıkany, fýnktsıonaldy reanımatsııa tósekterin satyp alýǵa jáne jańajyldyq syılyqtarǵa jumsaldy.
— Osy ýaqytta balalardyń qasynda bolatyn adamdarǵa alǵys bildirý, olardy qoldaý jáne olardyń aýyr jumysyn bólisý oryndy. biz palatalardy jaıly etý úshin bar kúshimizdi saldyq. Bizdiń birlesken kúsh-jigerimiz arqyly bul bastama osy kishkentaı balalardyń tezirek saýyǵýyna, olarǵa kúsh-qýat berip, eń bastysy, bolashaqqa degen senim beredi dep úmittenemiz. Eger balalardyń júzine kúlki úıirilse, bizdiń beker kúsh jumsamaǵanymyzdyń belgisi, — dedi uıymdastyrýshylardyń biri Aıgúl.
Jetekshi gematolog jáne medıtsına ǵylymdarynyń doktory Farıshta Muhammadnabıeva aýrýhana qanshalyqty jaqsy qarjylandyrylǵanyna qaramastan, árqashan problemalar bolǵanyn jáne bolatynyn atap ótti. Al olardy sheshýge berilgen kómek baǵa jetpes kómek.
— Qoldaýlaryńyz, qosqan úlesińiz úshin kóp rahmet. Biz tek elshilik deńgeıinde ǵana emes, sonymen qatar qazaqstandyq áriptesterimizben medıtsınalyq tájirıbemen bólisýde de odan ári yntymaqtastyqty asyǵa kútemiz, — dedi dáriger.
Bul naýqanǵa qosa kishkentaı patsıentterge tátti syılyqtar tabystaldy. Árbir balanyń asyl tilegi bar, al eriktiler olardy oryndaýǵa tyrysyp, palatadaǵy ómirdi jarqyn etýge tyrysty.