Qazaqstandyqtar SIM-kartany tirkeýde bıometrııadan ótýge mindetteledi
Sheteldik alaıaqtarǵa SIM-karta tirkeýge kómektesken qazaqstandyqtarǵa quqyqtyq jaýapkershilik engiziledi. Bul týraly QR Іshki ister mınıstriniń orynbasary Igor Lepeha Parlamentte aıtty, dep habarlaıdy Kazinform.
«Kóptegen adamdar «Aýystyrylatyn nómirlerdi buǵattaý júıesi bolsa, alaıaqtar shetelden qalaı qońyraý shala alady?» degen suraq týyndaýy múmkin. Buǵan eki sebep bar. Birinshisi – olar qazaqstandyq uıaly baılanys kompanııalarynyń nómirlerin paıdalana bastady. Sol baıaǵy «droperler» aqyly túrde elektrondy SIM-kartalardy óz attaryna tirkep, ony alaıaqtarǵa beredi. Osylaısha qylmyskerler WhatsApp qosymshasynda tirkeledi. Ony iske qosqan soń, alaıaqtar jábirlenýshilerge messendjer arqyly qońyraý shalady, mundaı jaǵdaıda olardyń ornalasqan jerin anyqtaý qıyndaıdy», – dep túsindirdi ІІM ókili.
Osy ýaqytqa deıin abonenttik nómirdi basqa adamdarǵa zańsyz bergeni úshin jaýapkershilik bolǵan joq. Bul is júzinde osyndaı áreketterdi kedergisiz iske asyrýǵa múmkindik berdi. Qazirgi ýaqytta bul olqylyq joıylýda. Ákimshilik quqyq buzýshylyq týraly kodekstiń 637-baby (Qazaqstan Respýblıkasynyń baılanys salasyndaǵy zańnamasyn buzý) osyndaı áreketter úshin quqyqtyq jaýapkershilikti kózdeıtin 18-tarmaqpen tolyqtyrylady.
Sondaı-aq baqylaý sharalaryn kúsheıtý úshin Tsıfrlyq damý mınıstrligi «Baılanys qyzmetterin kórsetý qaǵıdalaryna» tolyqtyrýlar jobasyn ázirledi, oǵan sáıkes telefon nómirlerin tirkeý kezinde azamattar «bıometrııadan» ótýge mindetti bolady. Bul shara azamattyq jaýapkershilikti arttyrady jáne uıaly baılanys qyzmetterin paıdalanýda tártip ornatýǵa múmkindik beredi.
Aıta keteıik, búgin Májiliste «Halyqtyń shamadan tys kredıt alýyn azaıtý jáne qarjy saýattylyǵyn arttyrý» taqyrybynda Parlament tyńdaýy ótti.
Buǵan deıin I. Lepeha sheteldik alaıaqtardyń qońyraýlary buǵattalǵanyn, alaıda qazaqstandyqtardyń ózderi azdaǵan syıaqy úshin alaıaqtarǵa járdem berip otyrǵanyn aıtqan edi.
