Qazaqstandyqtar referendýmǵa óte belsendi qatysty — túrkııalyq baıqaýshy
ASTANA. KAZINFORM — Túrkııa Respýblıkasynyń Joǵarǵy saılaý keńesiniń tóraǵasy Ahmet Iener Qazaqstandaǵy konstıtýtsııalyq referendýmnyń ashyq, ádil jáne qaýipsiz ótkenin aıtty.
— Qazaqstannyń demokratııa jolyndaǵy mańyzdy kezeńi bolyp sanalatyn konstıtýtsııalyq qurylym úderisine qatysý biz úshin úlken tájirıbe boldy. Búgin jarııalanǵan nátıjelerge sáıkes, Qazaqstan halqynyń saılaýǵa 73,12% deńgeıinde joǵary qatysýy demokratııa turǵysynan shyn máninde qýanyshty jaǵdaı. Sonymen birge, 87,15% daýys nátıjesiniń tirkelýi de qýantarlyq jaıt, — dedi Ahmet Iener elordada ótken brıfıngte.
Túrkııalyq baıqaýshy Qazaqstan halqynyń balalarymen birge daýys berý oryndaryna kelgenin, jastar men egde jastaǵy azamattardyń saılaýǵa erekshe mán bergenin baıqaǵanyn jetkizdi.
Saılaý úderisterine qatysty A. Iener Qazaqstan zańnamasy men halyqaralyq standarttarǵa sáıkes, referendýmnyń ashyq, ádil jáne qaýipsiz jaǵdaıda ótkenin aıtty.
— Qazaqstannyń Ortalyq referendým komıssııasy barlyq qajetti aqparatty azamattarǵa jetkizip otyrdy. Daýys berý ýchaskelerindegi qyzmetkerlerdiń sypaıylyǵy jáne qoıǵan suraqtarymyzǵa bergen jaýaptary Qazaqstannyń saılaý komıssııasy úlken jaýapkershilik tanytyp, tıisti daıyndyq pen oqytý júrgizgenin kórsetti. Ásirese daýys berý ýchaskelerinde múmkindigi shekteýli azamattar úshin kompıýterlik formatta saılaý protsesi men referendým týraly túsindirme mátinniń bolýyn erekshe ári bolashaqtaǵy saılaý tájirıbesinde qoldanýǵa bolatyn jaqsy tájirıbe dep sanaımyz, — dedi spıker.
Aıta keteıik, 16 naýryzdaǵy tańǵy saǵat 8:00–degi jaǵdaı boıynsha, elimizdiń barlyq óńirleri men sheteldegi 10 388 referendým ýchaskesinde daýystardy sanaý aıaqtaldy.
Referendýmǵa qoıylǵan máseleniń oń sheshimin jaqtap daýys bergen azamattardyń sany 7 mıllıon 954 myń 667 adam nemese 87,15%.
Búǵan deıin TMD baıqaýshylar mıssııasy referendým nátıjelerine áser etýi múmkin qandaı da bir zań buzýdy anyqtamaǵanyn aıtqan edi.
