Qazaqstandyqtar pasportty basty biriktirýshi sımvol dep sanaıdy
ASTANA. KAZINFORM – QR Prezıdenti janyndaǵy Qazaqstannyń strategııalyq zertteýler ınstıtýty aǵymdaǵy jyldyń 11 mamyry men 22 maýsymy aralyǵynda áleýmettanýlyq saýalnama júrgizdi. Іrikteme kólemi 8000 respondentti quraıdy. Saýalnamaǵa 17 oblys pen respýblıkalyq mańyzy bar qalalar: Astana, Almaty jáne Shymkenttiń 18 jastan asqan respondentteri qatysty.
Saýalnama barysynda respondentterge ultty biriktiretin negizgi belgilerdi anyqtaý usynyldy. Birinshi kezekte – bul pasportty respondentterdiń 46%-y negizgi biriktirýshi faktor dep sanaıdy. Ekinshiden, bul Qazaqstan jerinde týǵany jáne ortaq ata-babalardyń bolýy (39,9%). Sondaı-aq, saýalnamaǵa qatysqandardyń úshten biri (32,0%) ulttyń biriktirýshi elementi retinde tildiń ortaqtyǵyn kórsetedi.
Saýalnamaǵa qatysqan árbir besinshi adam (21,8%) eldiń jetistikteri úshin maqtanysh, patrıotızm sezimi jáne barshaǵa ortaq qundylyqtar, normalar men minez-qulyq (21,3%) ultty biriktiredi dep sanaıdy (jaýaptar sany 100%-dan asady, sebebi respondentterge birneshe jaýap nusqasyn tańdaý berildi).
Al bizdi elimizdiń azamaty etetin ne? Respondentterdiń basym kópshiligi azamattyqtyń mańyzdy kórinisi zańǵa baǵyný, zańdardy saqtaý dep sanaıdy (saýalnamaǵa qatysqandardyń 63,3%).
Eger adamdar ortaq, uqsas ıdealdarǵa ıe bolsa, kez-kelgen qoǵam úılesimdi jáne birtutas bolady. Qazaqstandyqtar otbasy (99,6%), jumys jáne eńbek (92,9%) jáne dostar (92,4%) sııaqty uǵymdardy mańyzdy dep sanaı otyryp, biraýyzdylyqty kórsetedi.
Saýalnamaǵa qatysqandardyń kópshiliginiń pikirinshe, qajyrly eńbek marapattalýy kerek: «tolyq kelisemin» jaýabyn respondentterdiń 66,2%-y, «kelisemin» jaýabyn 32,5%-y tańdaǵan. Sonymen qatar qoǵamda paternalıstik úmitter saqtalyp keledi, respondentterdiń 93,8%-y úkimet árbir azamat úshin jaqsy ómir súrý deńgeıin qamtamasyz etýi kerek dep sanaıdy («tolyq kelisemin» – 53,8%, «kelisemin» – 40,0%).
Saýalnama nátıjeleri qazaqstandyqtardyń basym kópshiliginiń (91,2%) túsiniginde ǵylym men tehnologııa ómir súrý sapasyn jaqsartýda sheshýshi ról atqaratynyn kórsetedi.
Respondentterdiń qundylyqtaryn taldaý erkindik qundylyǵynyń teńdikke qaraǵanda artyqshylyǵyn kórsetedi (62,9% jáne 33,8%). Al, qaýipsizdik erkindikpen salystyrǵanda mańyzdy qundylyq retinde qarastyrylady (68,7% jáne 28,6%).
Osylaısha, jınaqtalǵan málimetter azamattardyń qundylyqtarynyń birligin, otbasy, eńbek jáne qaýipsizdik qundylyqtarynyń basymdyǵyn kórsetedi.
