Qazaqstandyqtar oıyn-saýyqqa qansha qarjy jumsaıdy
ASTANA. KAZINFORM - Qazaqstandyqtar kontsert kórip, spektakl tamashalaýǵa, sporttyq jarystardy qaraýǵa asa kóp qarjy jumsamaıdy. Tek ataqty adamdardyń kontsertine bılet baǵasy joǵary.
Qalanyń qaıda ornalasqany mańyzdy
Baǵany salystyrǵan kezde biz kontsert, spektakl, sporttyq sharalar men qazir kóp suranysqa ıe Stand Up-ty tańdadyq. Reıtıng jasaǵan kezde tek Almaty, Astana men Shymkent sııaqty iri qalalardy aldyq. Sebebi dál osy qalalarda aýqymdy oıyn-saýyq keshteri jıi uıymdastyrylady.
Máselen aldaǵy úsh aptada Pavlodardaǵy Chehov atyndaǵy drama teatr men Aımaýytov atyndaǵy teatrda ne bolatynyn qaradyq. Mundaǵy bılet baǵasy 1 200-1 500 jáne 1 000-2 000 teńge. Al Isa Baızaqov atyndaǵy oblystyq fılarmınııa ártisteri kontsert usynady. Bılet baǵasy 2500-3000 teńge. Munda syrttan kelip, óner kórsetetinder az. Qazan aıynda eki komanda komedııalyq battl usynady. Baǵasy 5 000 – 10 000 teńge aralyǵynda. Sonymen birge Stand Up qaraýǵa 3 000 – 18 000 teńge tóleý kerek. Bıletti onlaın satatyn saıttardan ózge eshteńe de tabylmady. Sondyqtan tek iri megapolısterdi alyp, ondaǵy oıyn-saýyq keshteri bıletiniń baǵasyn bildik.
Kontsert
Oıyn-saýyq keshteriniń ishinde kontsert bıletiniń baǵasy joǵary bolyp tur. Bul jerde baǵa ártistiń ataǵyna baılanysty qoıylady. Alysqa ketpeı-aq Backstreet Boys tobynyń Astanadaǵy kontsert bıletiniń baǵasy 40 000 teńgeden bastalyp, 200 000 teńgege jetkenin kórip otyrmyz. Qazaqstandyq ártisterdiń kontsertine bılet ondaı qymbat emes. Almatyda aldaǵy aptalarda «Abaı álemi» kontsertin tamashalaýǵa bolady. Bılet baǵasy – 3000 teńge. Ári qaraı bılet baǵasy 5000 teńge bolyp tur. Eger siz sahnaǵa jaqyn jerden tańdasańyz, baǵa da óse beredi. Qazirgi kezde eń qymbat bılet quny – 25 000 teńge.
Astanada qoıylym, kontsert az bolyp shyqty. Degenmen demalys kúnderi keshkilik kontsert kórýge barýǵa bolady. Qazaqkontsert sahnasynan Erlan Rysqalıdiń «Abai lab» jeke shyǵarmashylyq keshin tamashalaýǵa bolady. Bılet baǵasy 2000-3000 teńge.
Al 24 qyrkúıek kúni qobyz únin estı alasyz. Bılet baǵasy 2 000 – 7 000 teńge. Eger ataqty ártisterdiń kontsertin alar bolsaq, án tyńdap, tynyǵý, ózińe rýhanı kesh syılaý úshin bıletti 8 000 – 22 000 teńge aralyǵynda satyp alasyz.
Taıaý kúnderi Shymkentte kontsert tamashalaý úshin 2 000 – 3000 teńge tóleısiz. Al qazan aıynda festıvalge barýǵa bolady. Kirý bıletiniń quny 2000 – 1 500 teńge. Ártisterdiń jeke kontserti de bar. Ataqty ánshilerdiń biriniń kontsertin tamashalaý úshin 5 000 – 10 000 teńge kerek. Al «qyzyqty kontsert» bıletiniń quny 5 000 teńgeden bastalyp, 30 000 teńgege jetti.
Sporttyq sharalar
Qazaqstan qalalarynda sporttyq shoý sharalar jıi uıymdastyrylmaıdy. Ásirese aqyly sporttyq jarystar az. Almatyda qyrkúıekte «Qaırat» FK men «Jeńis» oınaıdy. Munda bılet baǵasy – 1 500 teńge.
Astanada da fýtboldan sporttyq shara uıymdastyrylady. Tek úlken fýtbol emes, shaǵyn zalda ótetin kezdesý. 23 qyrkúıek kúni Qazaqstan quramasy óz alańynda Italııany qabyldaıdy. Bılet baǵasy 1 500 teńge. Bul anshlag bolǵaly tur.
Al Shymkentte mundaı sporttyq sharalardy qaraýǵa bar bolǵany 300 teńge jetkilikti. Jasóspirimder arasyndaǵy ÝEFA lıgasynda «Ordabasy» men «Dınamo Mınsk» komandalary kezdesedi. Bılet qazir satylyp jatyr. Dál osy qalada aralas jekpe-jekten týrnır ótedi. Týrnırdi tamashalaý baǵasy 2 000 – 15 000 teńge.
Qazaqstandyqtar úshin «Qaırat» - «Real» arasyndaǵy oıyndy stadıonnan kóri qymbatqa túsedi. Bılet 23 qyrkúıekten bastap satylady. Bılet baǵasy – 30 000 – 250 000 teńge.
Stand Up
Keıingi kezde qazaqstandyqtar arasynda Stand Up tanymal bola bastady. Eldi kúldirip, tamasha oı salatyn ázilkeshter arasynda tanymaldary da bar. Soǵan saı baǵa da kóterilip tur. Almatyda taıaý kúnderi birneshe Stand Up baǵdarlama usynatyn ázilkeshterdi tyńdaýǵa bolady. Kúlip, tynyǵatyndar úshin bılet baǵasy 5 000 teńgeden bastalyp, 15 000 teńgege deıin jetti.
Almatyǵa qaraǵanda Astanada Stand Up baǵdarlamaǵa tańdaý kóp. Ázilkeshterdiń kóbi elimizdiń astanasyn tańdaǵan jáne osynda shoǵyrlanǵan desek te bolady. Stendap sheberleri baǵany sharyqtatyp qoımaıdy. Kerisinshe, baǵa qoljetimdi ári áıelderge, kınematografııaǵa dep arnaıy baǵyttarǵa bólip, qalaýyńyzǵa qaraı tańdaýǵa múmkindik syılaıdy. Bılet baǵasy 2 000 teńgeden bastalyp 13 000 teńgege deıin jetti. Stand Up keshteriniń baǵasy sharanyń qaı jerde ótetinine tikeleı baılanysty. Keıde mundaı sharalar qarapaıym ǵana bar ishinde ótedi. Endi ǵana sahnaǵa shyǵyp júrgen kúldirgishke qaraǵanda kásibı ázilkeshterdiń keshin tamashalaý qymbatqa túsedi. Tipti keıde bılet satyp alyp ta úlgermeısiz. Kontsert jaqyndaǵanda anshlag bolady.
Shymkentte de Stand Up sheberleriniń kontserti ótip turady. Qazaqstan boıynsha týrǵa shyqqan ázilkeshtiń keshi munda da bolady. Bılet baǵasy – 10 000 – 20 000 teńge. Bul qyrkúıektegi shara. Kelesi Stand Up kesh tek qarasha aıynda ótedi. Ol kezde baǵa 5000 - 12000 teńge aralyǵynda bolady.
Teatr
Elimizde teatr bıletteriniń baǵasy ózge oıyn-saýyq keshterine qaraǵanda tómen. Munda klassıkadan bastap qazirgi zamandaǵy qoıylymdar usynylady.
Almatyda taıaý kúnderi kóptegen premera bolady. Teatrdaǵy bılet quny 1000 teńgeden bastalyp 4 000 teńgege deıin jetti. Munda da bılet sahna men kórermen arasyndaǵy araqashyqtyqqa qaraı ózgerip otyrady. Balalarǵa arnalǵan bılet baǵasy tómen.
Astanada baǵa joǵary. Eń arzany 1250 (balalarǵa arnalǵan bılet baǵasy) teńge bolsa, eń joǵarysy 5 000 teńgege jetti. Al Astana Opera-da bılet quny 6 000 teńgeden bastalyp tur. Munda tek akterlardyń oıynyn ǵana emes, mýzykalyq qoıylymdardy da kórýge bolady.
Shymkentte balalarǵa arnalǵan qoıylym baǵasy arzan. «Qyzyl telpek» ertegisin tamashalaýǵa barsańyz, bılet quny 700 teńge. Al eresekterge arnalǵan bılet quny – 3000 teńge.
Eske salsaq, ótken aptada kólikke tehnıkalyq qyzmet kórsetý ortalyqtaryndaǵy qyzmet qunyn salystyrdyq.