Qazaqstandyqtar otbasyn qandaı sebeppen qurady - zertteý

ASTANA. KAZINFORM – Qazaqstandyq qoǵamdyq damý ınstıtýty qazaqstandyqtar arasynda nekege turýdyń negizgi sebepterine qatysty áleýmettik zertteý nátıjelerin usyndy.

Zertteý derekterine sáıkes, nekege turýdyń basty sebebi retinde respondentterdiń 59,9%-y mahabbatty ataǵan. Bul kórsetkish otbasyn qurýda emotsıonaldyq faktorlardyń basym ekenin kórsetedi.

- Sondaı-aq azamattar nekege turýǵa áser etetin ózge de mańyzdy sebepterdi atap ótken. Atap aıtqanda, qatysýshylardyń 17%-y kózqarastar men qyzyǵýshylyqtardyń ortaqtyǵyn mańyzdy dep sanaıdy. Al 10,7%-y balanyń dúnıege kelýin negizgi sebepterdiń biri retinde kórsetken. Taǵy 5,5% respondent ata-anadan táýelsiz bolýdy nekege turýdyń sebebi retinde ataǵan, - dep jazdy ınstıtýttan.

Zertteý nátıjeleri qazaqstandyqtar úshin otbasy uǵymy eń aldymen baqyt pen mahabbatpen baılanysty ekenin kórsetti. Respondentterdiń 44,9%-y otbasyn dál osy qundylyqtarmen ushtastyrǵan.

Sonymen qatar azamattar neke uǵymyn qarym-qatynasty resmı túrde rásimdeý jáne otbasy qurýmen baılanystyrady.

Aıta keteıik, zertteý «Qazaqstan otbasylary – 2024» taqyrybynda júrgizilgen. Saýalnamaǵa 3000 respondent qatysqan.

Buǵan deıin Almatydaǵy Otbasyn qoldaý ortalyǵyna 1 myńnan astam ótinish túskeni habarlandy.