Qazaqstandyqtar ómir sapasyn oń baǵalaıdy — saýalnama
ASTANA. KAZINFORM — DATAmetrics kompanııasy halyqtyń áleýmettik kóńil-kúıin sıpattaıtyn áleýmettanýlyq zertteý nátıjelerin usyndy.
Bul derekter azamattardyń ómir sapasyna bergen baǵasyn, otbasynyń materıaldyq jaǵdaıyndaǵy ózgerister men bolashaqqa degen degen senim deńgeıin qamtyǵan.
Atalǵan málimetter QR Prezıdenti janyndaǵy Qazaqstannyń strategııalyq zertteýler ınstıtýtynyń tapsyrysy boıynsha 2026 jylǵy 13 maýsym men 2 shilde aralyǵynda júrgizilgen áleýmettanýlyq zertteýdiń nátıjesinde anyqtaldy.
Betpe-bet suhbat («face-to-face») ádisimen júrgizilgen saýalnamaǵa Qazaqstannyń barlyq óńirlerinen, sondaı-aq Astana, Almaty jáne Shymkent qalalarynan 18 jastan asqan 8000 turǵyn qatysty. Halyqtyń áleýmettik kóńil-kúıi adamdardyń óz ómirine, materıaldyq jaǵdaıyna jáne bolashaqqa degen senim deńgeıine qandaı baǵa beretini arqyly anyqtalady.
— Zertteý nátıjeleri osy kórsetkishterdiń barlyǵy boıynsha respondentterdiń jaýaptarynda oń kózqaras basym ekenin kórsetti. Eń joǵary kórsetkish ómirge rızalyq deńgeıi boıynsha tirkelgen. Saýalnamaǵa qatysýshylardyń 63,3%-y óz ómirine tolyq rıza ekenin aıtsa, taǵy 31,9%-y kóp jaǵdaıda qanaǵat bildiredi. Osylaısha, respondentterdiń 95,2%-y óz ómirine oń baǵa beredi. Al 3,4%-y óz ómirine onsha rıza emestigin, 1,1%-y múlde rıza emestigin málimdedi, — delingen habarlamada.
Óz ómirine berilgen oń baǵa otbasynyń materıaldyq jaǵdaıyn qabyldaý deńgeıinen de kórinis tabady.
Zertteýge qatysýshylardyń úshten ekisinen kóbi (67,6%) otbasylarynyń materıaldyq jaǵdaıy sońǵy jylda jaqsarǵanyn aıtqan. Onyń ishinde 29,8%-y jaǵdaıy aıtarlyqtaı jaqsarǵanyn, al 37,8%-y belgili bir deńgeıde jaqsarǵanyn atap ótti. Respondentterdiń 25,5%-y otbasynyń materıaldyq jaǵdaıy ózgermegenin aıtsa, 6,6%-y nasharlaı tústi dep sanaıdy.
Azamattardyń búgingi kúnge bergen baǵasy bolashaqqa degen úmit deńgeıine áser etedi. Zertteýdiń qorytyndylary boıynsha, saýalnamaǵa qatysqandardyń basym bóligi óz otbasynyń keleshegine senimmen qaraıdy.
— Mysaly, on respondenttiń shamamen segizi (78,6%) bir jyldan keıin búgingi kúnnen jaqsyraq ómir súretinine senedi. Onyń ishinde 45,0%-y óz jaǵdaıy aıtarlyqtaı jaqsarady dep úmittense, taǵy 33,6%-y belgili bir deńgeıde jaqsaratynyna úmitti. Sondaı-aq 15,9%-y óz otbasynyń turmys deńgeıi ózgerissiz qalady dep esepteıdi. Al, respondentterdiń 3,4%-y óz jaǵdaıy nasharlaýy múmkin dep sanaıtynyn aıtqan. Jalpy alǵanda, zertteý nátıjeleri halyqtyń áleýmettik kóńil-kúıiniń negizgi kórsetkishteri boıynsha oń baǵalaýdyń basym ekenin kórsetedi. Saýalnamaǵa qatysqandardyń kópshiligi óz ómirine rıza, otbasynyń materıaldyq jaǵdaıyndaǵy ózgeristerdi oń baǵalaıdy jáne aldaǵy ýaqytta turmys jaǵdaıynyń jaqsaratynyna senim bildiredi, — delingen habarlamada.
Іrikteý Qazaqstan Respýblıkasy halqynyń negizgi áleýmettik-demografııalyq sıpattamalaryna, atap aıtqanda turǵylyqty jeriniń túrine (qala/aýyl), jynysy men jasyna qaraı reprezentatıvti. Senimdilik yqtımaldyǵy 95% bolǵan jaǵdaıda iriktemeniń statıstıkalyq qatelik shegi ±1,1%-dan quraıdy.
Aıta keteıik, DATAmetrics kompanııasy bul zertteý nátıjelerin Qazaqstan Respýblıkasy Ortalyq saılaý komıssııasynyń 2026 jylǵy 3 shildedegi № OSK-11-07/ZT-K-29 habarlamasy negizinde jarııalap otyr.
Buǵan deıin Qazaqstanda halyqtyń naqty tabysy bir jyldan keıin alǵash ret artqanyn jazǵanbyz.
