Qazaqstandyqtar oqýlyqtar mazmunyn talqylaýǵa qatysa alady
ASTANA. KAZINFORM - Aqpannyń 12-sinen bastap jańadan ázirlengen oqýlyqtardyń mazmunyna qoǵamdyq talqylaýlar júrgizilip jatyr, dep habarlaıdy QR Oqý-aǵartý mınıstrliginiń Respýblıkalyq ǵylymı-praktıkalyq bilim mazmunyn saraptaý ortalyǵy.
talkylau.ebmso.edu.kz saıtynda oqýlyqtar mazmunynyń sapasy, qurylymy, ádistemelik tásilderi, baıandaý tili men bezendirilýine qatysty qoǵam men ǵylymı-pedagogıkalyq qaýymdastyq ókilderi syndarly pikirlerin bildire alady. Onda jańadan ázirlengen oqýlyqtar bar:
• 3-synyp úshin «Eńbekke baýlý», «Beıneleý óneri», «Orys tili» (orys tilinde oqytatyn mektepter úshin), shet tilderi (aǵylshyn, frantsýz);
• 3, 9-11 synyptar úshin «Nemis tili»;
• 5-9 synyptarǵa arnalǵan «Jahandyq quzyrettilik» oqýlyqtary qaǵaz nusqada;
• 3-synypqa arnalǵan «Tsıfrlyq saýattylyq/Tsıfrovaıa gramotnost» páni boıynsha elektrondy oqýlyqtar.
Qoǵamdyq talqylaýǵa ǵylymı-pedagogıkalyq qoǵam ókilderi, ádiskerler, ǵalymdar, sondaı-aq oqýlyqtardyń sapasyna beı-jaı qaramaıtyn qazaqstandyqtar qatysýǵa múmkindik aldy. Ol úshin kelesi qadamdardy oryndaý qajet: veb-portalda tirkelý, oqýlyqtardyń túpnusqa-maketterimen tanysý jáne «túsinikteme qosý» tetigi arqyly oqýlyqtardyń mazmuny men qurylymyna qatysty syn-pikirler, usynystar men eskertýlerdi jaza alasyz.
