Qazaqstandyqtar ókpe obyryn erte anyqtaýǵa arnalǵan skrınıngten ótedi
ASTANA. KAZINFORM — Qazaqstanda ókpe obyryn erte anyqtaýǵa arnalǵan jańa skrınıng baǵdarlamasy iske qosylady. Densaýlyq saqtaý mınıstrligi oǵan qatysatyn azamattardyń sanatyn bekitti.
Skrınıngke 50, 52, 54, 56, 58, 60, 62, 64, 66, 68 jáne 70 jasqa tolǵan erler men áıelder jiberiledi. Olar myna talaptardyń birine sáıkes bolýy tıis:
— bronh pen ókpeniń qaterli isigi boıynsha dıspanserlik esepte turmaýy;
— temeki shegetinder jáne temekini tastaǵanyna 15 jyldan aspaǵan bolýy;
— sońǵy 10 jyl ishinde densaýlyqqa zııandy óndiris oryndarynda jumys istegen bolýy kerek.
Sonymen qatar skrınıngtik tekserýlerdi ótkizý tártibi men merzimi de jańartyldy.
Іri eldi mekenderde qaterli isikterdi erte anyqtaýǵa arnalǵan skrınıng tirkelgen turǵyndar sany 30 myńnan asatyn emhanalarda uıymdastyrylady. Onda skrınıngtiń ótý barysyn baqylaý úshin ortalyqtandyrylǵan skrınıng ortalyqtary men call-ortalyqtar jumys isteıdi.
Sondaı-aq jumys berýshiler mindetti skrınıngten ótýi tıis qyzmetkerlerge tekserýden ótýge jaǵdaı jasap, olardy jumys ýaqytynda kedergisiz jiberýge mindetti. Bul kezeńde qyzmetkerdiń jumys orny men ortasha jalaqysy saqtalady.
Tıisti ózgerister Densaýlyq saqtaý mınıstriniń 2026 jylǵy 10 shildedegi № 75 buıryǵymen engizildi.
Aıta keteıik, buǵan deıin jumyskerlerdiń skrınıngten ótý tártibi men oǵan qatysty eńbek zańnamasynda kózdelgen kepildikter týraly materıal jarııalaǵan bolatynbyz.
