Qazaqstandyqtar nesıeden 14 kún ishinde aıyppulsyz bas tarta alady
ASTANA. KAZINFORM – Qazaqstandyqtarǵa kepilsiz qaryz rásimdeýden aıyppulsyz bas tartýǵa 14 kún beriledi. Bul norma QR Qarjy naryǵyn retteý jáne damytý agenttigi ázirlegen bankterge qoıylatyn jańa talaptarda kózdelgen.
Qujatqa sáıkes, bul quqyq múlik kepilimen qamtamasyz etilmegen qaryz sharttaryna, sondaı-aq osyndaı qaryzǵa baılanysty jasalǵan erikti saqtandyrý sharttaryna qoldanylady.
Qarjy óniminen nemese qosymsha qyzmetten shart jasalǵan kúnnen bastap 14 kúntizbelik kún ishinde bas tartýǵa bolady.
Alaıda alynǵan qaryzdan bas tartý tolyǵymen tegin bolmaıdy. Qaryz alýshy aqshany naqty paıdalanǵan kúnder úshin eseptelgen syıaqyny tóleýge tıis.
Saqtandyrý shartynan bas tartqan jaǵdaıda qarjy uıymy saqtandyrý sharty kúshinde bolǵan kezeńge qaraı saqtandyrý syılyqaqysynyń bir bóligin ustap qala alady. Sondaı-aq qarjy ónimin usynýǵa tikeleı baılanysty naqty jumsalǵan shyǵyndardy óteý qarastyrylǵan.
Qarjy uıymdary klıentke qaryzdan nemese qosymsha qyzmetten aıyppulsyz bas tartý múmkindigi týraly shart jasalǵanǵa deıin habarlaýǵa mindetti. Bas tartý rásimi qoljetimdi bolyp, tutynýshydan qosymsha áreketterdi talap etpeýge tıis.
Buǵan deıin Qazaqstanda bereshegi kóbeıgen azamattarǵa birneshe kredıtin bir júıe arqyly rettep, aı saıynǵy tólemin azaıtýǵa múmkindik beriletinin jazǵan edik.
