Qazaqstandyqtar nesıe alýǵa sanaly túrde qaraıdy — Mádına Ábilqasymova
ASTANA. KAZINFORM — Byltyr Qazaqstanda nesıe berý talaptarynyń kúsheıýi tutynýshylyq kredıtterdiń qarqynyn aıtarlyqtaı tómendetti. Bul týraly Qarjy naryǵyn retteý jáne damytý agenttiginiń tóraǵasy Mádına Ábilqasymova málimdedi.
Onyń aıtýynsha, qabyldanǵan zańnamalyq ózgeristerdiń nátıjesinde qazaqstandyqtar nesıe alýǵa sanaly túrde qaraı bastaǵan.
— Zańnyń áseri bar. Nesıe berýdiń qarqyny aıtarlyqtaı tómendedi. Buǵan deıin jyl saıyn 30 paıyzdan astam ósim kórsetken tutynýshylyq kredıtter qazir 6-7 paıyzdan aspaıdy. 2025 jyly osy deńgeı saqtaldy. 2026 jyldyń basynan beri de bul úrdis jalǵasyp keledi, ıaǵnı, tutynýshylyq kredıt berý kólemi azaıdy, — dedi agenttik tóraǵasy.
Sondaı-aq ol tólem merzimin keshiktirý talaptary da qatańdatylǵanyn atap ótti.
— Eger qaryz alýshynyń tólemi 1 kúnnen nemese 30 kúnnen astam ýaqytqa keshiktirilse, mıkroqarjy uıymdary men bankter tarapynan shekteýler qoldanylady. Biz qaryz alýshylardy táýekel deńgeıine qaraı sanattarǵa bóldik. Joǵary táýekel tobyna jatatyn azamattarǵa kredıt berilmeıdi, — dedi Mádına Ábilqasymova.
Onyń málimetinshe, qaryzdardyń qaıtarylmaý kórsetkishi de tómendegen.
— Keıbir bankterde bul kórsetkish buryn 9-10 paıyz bolsa, qazir 4 paıyzdan tómen. Biz barlyq qarjy uıymdary boıynsha jaǵdaıdy turaqty baqylaýda ustap otyrmyz, — dedi ol.
Agenttik bankterden bólek ózge de qarjy uıymdarynyń qyzmetin qadaǵalaıdy. Olardyń qatarynda mıkroqarjy uıymdary men lombardtar bar.
Al jeke tulǵalardyń kóleńkeli túrde qaryz berý qyzmeti Azamattyq kodeks aıasynda retteledi, sebebi olar resmı qarjy uıymdaryna jatpaıdy.
Aıta keteıik, byltyr ekonomıkany nesıelendirý kólemi 51 trln teńgege jetken.
