Qazaqstandyqtar nege EO elderiniń vızasyn uzaq kúte bastady – SІM
ASTANA. KAZINFORM – QR Syrtqy ister mınıstrligi Eýropalyq odaq elderine vızalyq ótinishterdi qaraý merziminiń uzarýyna qatysty túsinikteme berip, vızalyq rejımdi jeńildetý jónindegi kelissózderdiń barysy týraly aıtty.
Syrtqy ister mınıstrliginiń resmı ókili Erlan Jetibaevtyń aıtýynsha, vıza rásimdeý merziminiń uzarýy týrıstik maýsymnyń bastalýyna baılanysty sheteldik dıplomatııalyq ókildikterge júginýshiler sanynyń artýymen baılanysty bolýy múmkin.
– Biz bul jaǵdaıdy kórip otyrmyz jáne barlyq qajetti aqparatty áriptesterimizge jetkizip kelemiz. Aıta ketý kerek, vıza berý árbir memlekettiń egemen quqyǵy. Sondyqtan olar ótinishterdi ózderiniń ulttyq zańnamasy aıasynda qaraıdy. Qazirgi ýaqytta azamattarymyzǵa qujattardy aldyn ala tapsyrýǵa jáne olardyń vıza sanatyna qoıylatyn barlyq talapqa tolyq sáıkes bolýyna muqııat mán berýge keńes beremiz, – dedi Erlan Jetibaev brıfıng barysynda.
Ol sondaı-aq Qazaqstannyń Eýropalyq odaqpen vızalyq talaptardy jeńildetý jáne readmıssııa máseleleri boıynsha kelissózderdi jalǵastyryp jatqanyn eske saldy.
Resmı ókildiń málimetinshe, osy baǵyttaǵy konsýltatsııalardyń úshinshi raýndy Brıýssel qalasynda ótti.
– Jalpy, bul úderis óte jaqsy qarqynmen ilgerilep keledi. Jaqyn arada bul baǵyttaǵy jumystar týraly tolyǵyraq aqparatpen bólise alamyz dep oılaımyn, – dedi Erlan Jetibaev.
Buǵan deıin Qazaqstan men Eýropalyq odaq delegatsııalary vızalyq talaptardy jeńildetý jáne readmıssııa týraly kelisim jobalary boıynsha kelissózderdiń kezekti kezeńin tabysty ótkizgenin jazǵanbyz.
