Qazaqstandyqtar ne úshin úlken qalalardan kóshkisi keledi
ASTANA. KAZINFORM – Qazaqstanda halyqtyń úlken qalalarǵa jappaı kóshý úrdisi birtindep ózgerýi múmkin. Óıtkeni megapolıs turǵyndarynyń arasynda qala syrtynda nemese shaǵyn eldi mekenderde ómir súrýdi qalaıtyndar kóbeıip keledi.
Shıkizat óndiretin emes, ómir súrýge qolaıly qalalar qajet
Bul úrdistiń keńinen taralýy úshin óńirlerge qosymsha qarjy bólýmen ǵana shektelýge bolmaıdy. Infraqurylymdy damytyp, qyzmet kórsetý sapasyn jaqsartý jáne kásipkerlikke qolaıly jaǵdaı jasaý qajet. Sonda ǵana shaǵyn qalalar men aýyldar iri megapolısterge balama bola alady. Al ýrbanızatsııa men óńirlerdiń damýy arasyndaǵy tepe-teńdik qoǵamnyń jańa damý kezeńine aıaq basqanyn kórsetedi.
Quryltaı depýtaty Nıkıta Shatalovtyń pikirinshe, búginde kóptegen oblys ortalyǵynda uqsas máseleler bar. Eski turǵyn úıler kóp bolǵanymen, jańalary jetkilikti deńgeıde salynyp jatqan joq. Depýtat qurylys kompanııalaryn tartý úshin tıimdi jaǵdaı jasaý qajet dep esepteıdi. Atap aıtqanda, jer telimderi men ınjenerlik ınfraqurylymǵa qol jetkizýdi jeńildetip, salyqtyq jeńildikter men turǵyn úıge suranysty yntalandyratyn baǵdarlamalardy qarastyrýdy usynady.
– Eń bastysy, oblys ortalyqtary men qalalardy ken oryndarynyń janyndaǵy jumysshylar ýaqytsha turatyn eldi mekenderge aınaldyrmaı, adamdardyń turaqty ómir súrýine qolaıly meken retinde damytý qajet, – dedi depýtat BIZDIÑ ORTA podkastynda.
Osylaısha, iri qalalardan shalǵaı ornalasqan eldi mekenderdiń tirshiligi bir ǵana óndiris salasyna nemese jaqyn mańdaǵy ken oryndaryna táýeldi bolmaýy tıis. Olarda kásiporyndar ashylyp, jańa jumys oryndary qurylýy qajet. Sondaı-aq turǵyndardyń sol jerde turaqtap, bolashaǵyn josparlaýyna múmkindik beretin jaǵdaı jasalýy kerek.
Internet halyqtyń kóshi-qon baǵytyn ózgerte ala ma
Al jaqsy jumys pen jaıly ómirdi shaǵyn qaladan da tabýǵa bolsa she
Qazaqstandyq qoǵamdyq damý ınstıtýty basqarma tóraǵasynyń orynbasary Azamat Baıǵalıev aldaǵy ýaqytta iri qala turǵyndarynyń bir bóligi shaǵyn eldi mekenderge qonys aýdarýy múmkin ekenin aıtady. Buǵan baspana jaldaý qunynyń qymbattyǵy, úlken qalalardaǵy qarbalas tirshilik pen adamdardyń tynysh ortada ómir súrýge umtylysy áser etýi yqtımal.
Sarapshy mundaı ózgeriske jol ashatyn negizgi sharttardyń biri retinde tsıfrlyq ınfraqurylymdy damytýdy atady.
– Eger ınternet Astanada da, shalǵaı aýdandarda da birdeı turaqty jumys istese, adamdar iri qalaǵa táýeldi bolmaı, qashyqtan eńbek etýge jáne tsıfrlyq qyzmetterdi paıdalanýǵa kóbirek múmkindik alady, – deıdi sarapshy.
Degenmen ınternettiń sapaly bolýy ǵana aýylǵa kóshkisi keletinderdiń sanyn arttyra almaıdy. Otbasylar úshin jaqsy mektep pen qoljetimdi medıtsınalyq kómek mańyzdy. Al eńbekke qabiletti turǵyndarǵa turaqty tabys tabatyn múmkindik qajet. Sondyqtan ınternet jelisin damytý isi jaıly mektepter, aýyldyq aýrýhanalar men turǵyn úıler salýmen qatar júrgizilýi tıis. Memleket te jańa turǵyndardy qabyldaýǵa qajetti jaǵdaıdy aldyn ala jasaýy kerek.
Jergilikti bılikke erkindikpen birge jaýapkershilik te qajet
Shaǵyn qalalardyń turǵyndar úshin tartymdy bolýy tek qosymsha qarjyǵa baılanysty emes. Bólingen qarajattyń qalaı jumsalatyny da mańyzdy. Jergilikti bılik qurylys kompanııalaryn tartyp, kásipkerlerge qolaıly jaǵdaı jasap, ınfraqurylym máselelerin sheshe alýy qajet.
Azamat Baıǵalıev óńir basshylaryna kóbirek derbestik berý qajettigine nazar aýdardy. Osy oraıda ol Prezıdent Qasym-Jomart Toqaevtyń árbir basshy batyl sheshim qabyldap, onyń jaýapkershiligin óz moınyna alýǵa daıyn bolýy kerek degen sózin eske saldy.
Osylaısha, óńirlerdi damytý úshin birneshe máseleni qatar sheshý qajet. Atap aıtqanda, jańa jumys oryndaryn ashyp, turǵyn úı qurylysyn jandandyrý, áleýmettik ınfraqurylymdy jaqsartý jáne tsıfrlyq múmkindikterdi keńeıtý mańyzdy.
Eger mundaı jaǵdaı tek megapolısterde ǵana emes, shaǵyn qalalar men aýyldarda da jasalsa, qazaqstandyqtardyń tańdaý múmkindigi artady. Sonda adamdar mansap jolyn qaı jerde jalǵastyratynyn, balalaryn qaıda ósiretinin jáne bolashaǵyn qaı óńirmen baılanystyratynyn óz qalaýy boıynsha sheshe alady.
Buǵan deıin Kazinform agenttigi Astananyń ómir súrýge qanshalyqty qolaıly qala ekenin halyqaralyq ólshemder negizinde taldaǵan edi.
