Qazaqstandyqtar memlekettik merekelerdi kóbine otbasymen ótkizedi – zertteý
ASTANA. KAZINFORM – Qazaqstandyqtardyń basym bóligi memlekettik merekelerdi otbasymen birge atap ótedi. Mundaı derekti Qazaqstandyq qoǵamdyq damý ınstıtýty júrgizgen áleýmettik saýalnama nátıjesi kórsetti.
Zertteý qorytyndysyna sáıkes, respondentterdiń 68%-y merekelerdi jaqyndarymen birge ótkizetinin aıtqan. Bul kórsetkish óńirlerde erekshe joǵary deńgeıde tirkelgen. Atap aıtqanda, Ulytaý oblysynda – 97%, Batys Qazaqstan oblysynda – 91,7%, Abaı oblysynda – 89,5%.
Mamandardyń pikirinshe, bul memlekettik merekelerdi atap ótýde otbasylyq dástúrlerdiń mańyzdy ról atqaratynyn ańǵartady.
Sonymen qatar saýalnamaǵa qatysýshylar birneshe jaýap nusqasyn tańdaǵanyn eskersek, respondentterdiń 48,8%-y merekelerdi dostarymen, áriptesterimen nemese kórshilerimen birge ótkizgendi jón kóretinin kórsetken. Mundaı úrdis ásirese Batys Qazaqstan, Aqtóbe jáne Ulytaý oblystarynda jıi baıqalǵan.
Al kontsertterge, festıvalder men sherýlerge qatysýdy qatysýshylardyń 36,4%-y tańdaǵan.
Zertteý nátıjeleri memlekettik merekelerdiń qazaqstandyqtar úshin jaı ǵana demalys kúni emes, jaqyn adamdar arasyndaǵy baılanysty nyǵaıtatyn jáne ortaq qundylyqtardy dáripteıtin qoǵamdyq ári otbasylyq dástúrge aınalǵanyn kórsetti.
Sońǵy jyldary elimizde memlekettik merekelerdi otbasylyq formatta atap ótý úrdisi kúsheıip keledi.
Aıta keteıik, buǵan deıin HQO-lar mamyr aıyndaǵy merekelerge baılanysty qalaı jumys isteıtini habarlandy.
