Qazaqstandyqtar memlekettik qyzmetti úıden shyqpaı ala alady
ORAL. KAZINFORM — Endi qazaqstandyqtarǵa memlekettik qyzmetti alý úshin HQKO-ǵa júginýdiń qajeti joq. Azamattar halyqqa qyzmet kórsetý ortalyǵynyń qyzmetkerin úıge shaqyrýǵa múmkindik beretin jańa servısti paıdalana alady. Belgilengen ýaqytta maman kórsetilgen mekenjaı boıynsha kelip, memlekettik qyzmetti kórsete alady.
«Azamattarǵa arnalǵan úkimet» memlekettik korporatsııasy» KEAQ BQO fılıalynan málim etkenindeı, HQKO-dan tys jerde menedjerler tólqujat, jeke kýálik, júrgizýshi kýáligin alý jáne kólik quraldaryn tirkeý jónindegi qyzmetterdi qospaǵanda, memlekettik qyzmet túriniń kez kelgenin kórsete alatynyn eskerý qajet.
Pılottyq joba Qazaqstannyń barlyq óńirlerinde iske qosyldy. Servısti paıdalaný úshin memlekettik korporatsııanyń resmı saıtynda «jeke menedjerdi úıge shaqyrý» batyrmasyn basyp, qajetti málimetterdi toltyrý qajet. Sondaı-aq, ótinimderdi 1414 biryńǵaı baılanys ortalyǵy arqyly da berýge bolady. «Azamattarǵa arnalǵan úkimet» mamandary málimetterdi naqtylaý maqsatynda jáne menedjerdiń kelý ýaqytyn belgileý úshin qyzmet alýshymen baılanysatyn bolady.
«Memlekettik korporatsııa turaqty túrde servısterdi jetildirý úshin jumys júrgizip jatyr. Buǵan deıin biz jeke menedjerler arqyly HQKO-da basym kezek arqyly qyzmet alý múmkindigin iske asyrǵan bolatynbyz. Endi halyqqa qyzmet kórsetý ortalyqtarynyń mamandaryn úıge shaqyrtyp, qyzmetti úıden shyqpaı alýǵa bolady. Bul ýaqyt únemdegisi keletin azamattar úshin óte yńǵaıly», - dep atap ótti «Azamattarǵa arnalǵan úkimet» MK basqarma tóraǵasy Arman Kenjeǵalıev.
Budan buryn memlekettik korporatsııa HQKO-dan daıyn qujattardy jetkizý jobasyn da iske asyrǵan bolatyn. Qazirgi ýaqytta 144 memlekettik qyzmet boıynsha qujattar jetkiziledi. Olardyń ishinde jyljymaıtyn múlikke quqyqtardy (aýyrtpalyqtardy) memlekettik tirkeý, jer ýchaskelerine aktiler, apostıl qoıylǵan qujattar, muraǵattyq anyqtamalar berý qyzmetteri bar.
Eske sala keteıik, budan buryn Qazaqstanda Konstıtýtsııa kúni HQKO-lar jumys istemeıtinin jazǵan bolatynbyz.
