Qazaqstandyqtar London marafonynda júgirdi
LONDON. KAZINFORM - Ulybrıtanııa astanasynda London marafony ótip, 160-qa jýyq memleketten myńdaǵan adam qatysty. Jelaıaqtardyń arasynda bir top qazaqstandyq ta bar. Máre syzyǵyna alǵashqylardyń biri bolyp jetken otandastarymyzben Tumandy Albıondaǵy Kazinform tilshisi Ǵalymjan Qaramanuly suhbattasty.
Jelaıaqtar kásibı, áýesqoı jáne múmkindigi shekteýli sportshylar retinde birneshe topqa bólinip jarysty. Olar birneshe saǵattyń ishinde Londonnyń kórneki oryndarynyń janynan júgirip ótti. Kásibı jelaıaqtardyń arasynan erlerden alǵashqy bolyp, kenııalyq Aleksandr Mýtıso Mýno keldi. Áıelderden onyń jerlesi, qazirgi olımpıada chempıony Peres Djepchırchır top jaryp, rekord ornatty.
Áýesqoı sportshylardyń arasynda 30-ǵa jýyq otandasymyz da boldy. Aralarynda álemdegi 6 iri: Boston, Berlın, Chıkago, Nıý-Iork jáne Tokıo marafondaryna qatysyp, endi mine London kóshelerimen júgirip ótken jelaıaqtar da bar. Kópshiligi kásipkerler. Óıtkeni Ulybrıtanııa astanasynyń shyńyn baǵyndyrmas buryn qymbat saıahat shyǵyndaryn kótere alýlary kerek.
«London marafony óte keremet ótti. London bolǵan soń biz kishkene jańbyr jaýady ma dep qoryqtyq. Biraq kún raıy búgin keremet boldy. Kún sáýlesi shyǵyp, aýa temperatýrasy jyly boldy. Júgirýge óte yńǵaıly», - deıdi Oral qalasynan kelgen marafonshy Ashat Ramazanov.
«35-shi shaqyrymnan keıin qıyn boldy. Qarqynym baıaýlap, aıaǵym tala bastady. Negizinde, bul qalypty jaǵdaı. Keıbir adamdar, tipti, jaıaý júrýge kóshti. Óz-ózimdi jeńip, sońǵy 1,5 shaqyrymda jyldamdyǵymdy údettim», - deıdi Oraldan kelgen taǵy bir marafonshy Ǵanı Sultanov.
London marafonyna sheteldikterge tirkelý ońaı sharýa emes. Jarysqa qatysýǵa jyl saıyn jarty mıllıonnan astam adam nıet bildiredi. Lotoreıadan utqandary ǵana 50 myń jelaıaqtyń qataryna qosylady. Qalǵandary lıtsenzııasy bar týroperatordan oryn satyp alýy kerek. Qazaqstandyqtardyń kópshiligi Londonǵa otbasy múshelerimen birge kelgen.
«Otbasymmen kelgendegi maqsatym eń bastysy bala-shaǵa óskennen keıin ákesi sııaqty júgirse eken degen oı. Bolashaqta basqa nárselerge emes sportqa qyzyqsa eken degen úmit», - deıdi shymkenttik marafonshy Ashat Nurlybaev.
Júgirý týrızmine degen suranys jyldan jylǵa artyp keledi. Bul - jańa qalany kórip qana qoımaı, qundy tájirıbe jınaýǵa da mol múmkindik. Marafondar, tipti, Soltústik polıýste de uıymdastyrylady. Memlekettiń ekonomıkalyq qýatyn kúsheıtip, jalpy ishki ónimniń artýyna sebepshi bolatyn sharalardy Qazaqstanda da ótkizýge bolady, deıdi mamandar. Ásirese, elimizdiń taýly aımaqtaryna degen suranys joǵary.
«Sheteldikterdiń qyzyǵýshylyǵy óte joǵary. Óıtkeni olar bizdiń tabıǵatqa qatty qyzyǵady. Týrıster jańa mekenderdi kórgisi keledi. Olar kóp jerde bolǵan adamdar ǵoı, negizinde. Sheteldikter, mysaly, tas jolda ótetin marafondardyń barlyǵyn júgirip qoıǵan. Olarǵa Qazaqstan taýlaryna kelip, júgirý óte qyzyq bolyp tur», - deıdi týrıstik agenttik ókili Janat Turǵynbaev.
London marafony bıyl 42-shi jyl qatarynan uıymdastyrylyp otyr. Tipti, pandemııa kezinde de toqtatylǵan joq - vırtýaldy formatta ótti. Qaıyrymdylyq maqsatynda júgiretin jelaıaqtar jyl saıyn ondaǵan mıllıon sterlıng fýntyn jınap, arnaıy qorlarǵa aýdarady.
