Qazaqstandyqtar Quryltaı saılaýyna qatysty aqparatty qaıdan alady — saýalnama nátıjeleri
ASTANA. KAZINFORM — Eýrazııalyq ıntegratsııa ınstıtýty júrgizgen áleýmettik zertteý qazaqstandyqtardyń Quryltaı saılaýy qarsańynda partııalardyń saılaýaldy baǵdarlamalary týraly málimetterdi qandaı derekkózderden alatynyn kórsetti.
Instıtýttyń áleýmettik zertteýler departamentiniń basshysy Gúlden Emishevanyń aıtýynsha, qazaqstandyqtar saılaý naýqany týraly aqparatty negizinen mynadaı derekkózderden alady:
• Telearnalar — 51,6%;
• Instagram — 44,5%;
• Aqparattyq ınternet-portaldary — 32,5%;
• Otbasy jáne týystarymen áńgimelesý barysynda — 27,4%;
• TikTok — 23,8%;
• Jumys ornynda — 22,5%;
• Dostarmen áńgime-dúken — 21,7%.
Instıtýt ókilderiniń túsindirýinshe, saýalnamaǵa qatysqandarǵa birneshe jaýap nusqasyn qatar tańdaýǵa ruqsat etilgen. Sondyqtan kórsetkishterdiń jalpy jıyntyǵy 100%-dan asady.
— Bul nátıjeler saıası kontentti buqara, eń aldymen, telearnalardan kóretinin bildiredi. Al áleýmettik jeliler arasynda Instagram men TikTok eń tanymal platformalar bolyp otyr. Sonymen qatar, azamattar saılaýǵa qatysty aqparatty kúndelikti aralasatyn ortasymen talqylap, sol arqyly da málimet alatyny belgili boldy, — dedi Gúlden Emisheva.
Aıta keteıik, zertteý 2026 jylǵy 16-26 shilde aralyǵynda face-to-face (betpe-bet) suhbat ádisimen júrgizildi. Saýalnamaǵa 17 oblystan, sondaı-aq Astana, Almaty jáne Shymkent qalalarynan 4000 respondent qatysty.
Aıta keteıik, buǵan deıin QSZI sarapshysy saılaýshylar tańdaýyna áser etetin negizgi faktorlardy ataǵanyn jazǵanbyz.
