Qazaqstandyqtar kúnine qansha dári satyp alady
ASTANA. KAZINFORM – Tañba biryńǵaı taýarlardy tańbalaý jáne qadaǵalaý operatory dári-dármekti tsıfrlyq tańbalaý júıesiniń statıstıkasyn usyndy. Júıe iske qosylǵannan beri Qazaqstanda 513 mıllıon dári-dármek qaptamasy tańbalanyp, onyń ishinde 104 mıllıonnan astamy dárihanalarda satylǵan.
Dárilik zattardy mindetti tańbalaý 2024 jylǵy 1 shildede engizildi. Sol ýaqyttan beri dárihana sóreleri kún saıyn tańbalanǵan preparattarmen tolyqtyrylýda, olardyń úlesi búginde 65%-dan asty. Biryńǵaı operator júıesiniń derekteri boıynsha, qazaqstandyqtar dárihanalardan kúnine jarty mıllıonnan astam tańbalanǵan dári-dármek satyp alady. Mysaly, 2025 jylǵy 26 tamyzdaǵy jaǵdaı boıynsha elimizde 788 myń qaptama dári-dármek satylǵan. Jalpy tamyz aıynda kúndik satylym dınamıkasy 480 myńnan 788 myńǵa deıingi aralyqta bolǵan.
Óńirler boıynsha eń kóp satylym Almatyda tirkeldi – 21 mıllıonnan astam qaptama, Qaraǵandy oblysynda – 12 mıllıon, úshinshi orynda Shymkent – 11 mıllıonnan astam qaptama.
2025 jyldyń tamyzynyń sońyndaǵy jaǵdaı boıynsha dárihanalardaǵy satylym kóshbasshysy atsetılsalıtsıl qyshqyly – 4,29 mıllıon qaptama. Etıl spırtin (4 mln) jáne dástúrli favorıt paratsetamoldy (3,64 mln) basyp ozǵan. Degenmen, etıl spırti ártúrli nysandarda TOP-10-ǵa eki birdeı pozıtsııamen kirdi: 2-orynda 4 mln qaptamamen jáne 8-orynda «Etıl spırti-DF» túrinde 1,45 mln qaptama. Jalpy alǵanda, etıl spırti 5,45 mıllıon qaptama kólemimen absolıýtti kóshbasshy.
Sonymen qatar tańbalaý júıesi memlekettik bıýdjet esebinen bólinetin dári-dármektiń tolyq baqylaýyn qamtamasyz etedi. Tańbalaý engizilgennen beri qazaqstandyqtarǵa: ambýlatorııalyq dári-dármekpen qamtamasyz etý aıasynda 18,7 mıllıon qaptama, statsıonarlyq em aıasynda 34,3 mıllıon qaptama tańbalanǵan dári berilgen.
«Tańbalaý júıesi memlekettik bıýdjet qarajatyna satyp alynatyn dárilerdi berýdi tolyqtaı ashyq etedi. Memlekettik organdar naqty ýaqyt rejıminde qaı dári, qandaı kólemde jetkizilgenin, qazir qaıda turǵanyn jáne kim arqyly qamtamasyz etilgenin kóre alady», – dedi dári-dármekti tańbalaý jobasynyń jetekshisi Anar Karıbaeva.
Aıta keteıik, búgingi tańda taýarlardy tańbalaý jáne qadaǵalaý aqparattyq júıesinde dári-dármek aınalymynyń 10 myńnan astam qatysýshysy tirkelgen. Olardyń ishinde: 19 otandyq óndirýshi, shamamen 140 sheteldik óndirýshi, 300-den astam ımporttaýshy/dıstrıbıýtor, 3 900-den astam medıtsınalyq uıym, 4 630 dárihana jáne 1 814 ÁMSQ jetkizýshisi bar.
Qazaqstanda barlyq dári-dármekke mindetti tsıfrlyq tańbalaý jáne qadaǵalaý 2024 jylǵy 1 shildeden bastap qoldanylady. Júıe árbir qaptamaǵa qoıylatyn biregeı Data Matrix kodtarynyń arqasynda dáriniń óndiristen bastap sońǵy tutynýshyǵa satylǵanǵa deıingi tolyq ómirlik tsıklin baqylaýǵa múmkindik beredi. Tańbalaý kontrafakt pen zańsyz aınalymǵa qarsy kúrestiń negizgi quralyna aınalyp, sondaı-aq farmbaqylaýdyń tıimdiligin arttyrýǵa jáne dárilerdiń sapasyn qadaǵalaýǵa septigin tıgizdi.
Densaýlyq saqtaý júıesinde dári-dármek baǵasyn 30%-ǵa deıin tómendetý sharalary qabyldanbaq.