Qazaqstandyqtar Koreıada 2028 jyldan bastap EPS arqyly jumysqa ornalasady
ASTANA. KAZINFORM — Qazaqstan Respýblıkasy Prezıdenti Qasym-Jomart Toqaevtyń Koreıa Respýblıkasyna memlekettik sapary aıasynda eńbek kóshi-qony salasynda mańyzdy kelisimge qol jetkizildi.
Eki el basshylarynyń kelissózderi qorytyndysy boıynsha ekijaqty 13 qujatqa qol qoıyldy. Solardyń biri — Qazaqstan Respýblıkasy Eńbek jáne halyqty áleýmettik qorǵaý mınıstrligi men Koreıa Respýblıkasynyń Jumyspen qamtý jáne eńbek mınıstrligi arasynda Jumysqa ornalasýǵa ruqsat berý júıesi (Employment Permit System, EPS) aıasynda qyzmetkerlerdi jiberý jáne qabyldaý týraly ózara túsinistik týraly memorandým.
Memorandým Qazaqstan azamattarynyń Koreıa Respýblıkasynda resmı ári zańdy túrde jumysqa ornalasýyna jol ashady. Jumysqa ornalasýǵa qatysty barlyq rásim eki eldiń ýákiletti memlekettik organdary arqyly resmı eńbek sharty negizinde júrgiziledi.
EPS júıesi Koreıa Respýblıkasynda 2004 jyldan beri júzege asyrylyp keledi. Júıe jumys kúshi qajet kásiporyndarǵa shetel azamattaryn uıymdasqan túrde jumysqa qabyldaýǵa múmkindik beredi. Koreıa tarapynan EPS júıesiniń jumysyn memlekettik HRD Korea uıymy qamtamasyz etedi. Qazaqstan tarapynan bul baǵytta ýákiletti organ men eńbek mobıldiligi ortalyqtary jumys isteıdi.
EPS aıasynda azamattarǵa 3 jylǵa deıingi merzimge E-9 vızasy beriledi. Vızany 4 jyl 10 aıǵa deıin uzartýǵa bolady. Baǵdarlama boıynsha jumysqa ornalasý bes negizgi baǵytta júzege asyrylady: óndiris, qurylys, aýyl jáne mal sharýashylyǵy, balyq sharýashylyǵy, sondaı-aq qyzmet kórsetý salasy.
2026 jyldyń 14 tamyzynda Koreıa Respýblıkasynyń Úkimeti Qazaqstandy EPS júıesine qatysýshy 18-shi memleket retinde qosý týraly resmı sheshim qabyldady. 2026 jyly júıe boıynsha sheteldik jumysshylarǵa bólingen jalpy kvota 80 myń adamdy quraıdy. Qazaqstan úshin jeke kvota baǵdarlamany tolyq iske qosqannan keıin Koreıa tarapynyń sheshimimen aıqyndalady.
2028 jyldan bastap Qazaqstan azamattaryn EPS baǵdarlamasyna qabyldaý josparlanyp otyr. Oǵan deıin Qazaqstan tarapy qajetti uıymdastyrý jumystaryn júrgizedi. Atap aıtqanda, Almaty qalasynda arnaıy EPS ortalyǵy ashylyp, EPS-TOPIK testileý júıesi iske qosylady. Sondaı-aq kandıdattardy Koreıaǵa shyǵýǵa deıin daıarlaý uıymdastyrylady.
EPS júıesiniń iske qosylýy Qazaqstan azamattaryna Koreıada zańdy túrde jumysqa ornalasýǵa, resmı eńbek tájirıbesin jınaqtaýǵa jáne kásibı biliktiligin arttyrýǵa qosymsha múmkindik beredi. Memleketaralyq deńgeıdegi bul yntymaqtastyq jumysqa ornalasý rásimderiniń ashyq ári rettelgen túrde júrgizilýine jáne eki eldiń ýákiletti organdarynyń tikeleı ózara is-qımylyna negiz bolady.
