Qazaqstandyqtar qyzmettik pasportpen Eýropanyń úsh eline vızasyz bara alady
ASTANA. KAZINFORM – Sońǵy on jylda Qazaqstan men Belgııa arasyndaǵy taýar aınalymy úsh ese ósti. Al Belgııanyń Qazaqstan ekonomıkasyna salǵan ınvestıtsııasy 10 mlrd dollardan asty. Bul týraly Belgııanyń federaldyq mınıstri Jan-Lıýk Krıýıke Aqordada ótken kelissózder barysynda málimdedi.
Eýropalyq mınıstrdiń aıtýynsha, búgingi memlekettik sapar Astanadaǵy Belgııa elshiliginiń ashylǵanyna 20 jyl tolǵan kezeńmen tuspa-tus kelip otyr. Bul – ekijaqty qarym-qatynastar tarıhyndaǵy mańyzdy beles.
– Memlekettik sapardyń naqty nátıjelerine de toqtalǵym keledi. 1 qarashadan bastap Qazaqstannyń qyzmettik pasport ıelerine vızasyz saparlaýǵa múmkindik beretin Benılıýks hattamasy (Belgııa, Nıderland, Lıýksembýrg) kúshine enedi. Budan bólek, eki eldiń syrtqy ister mınıstrlikteri arasyndaǵy yntymaqtastyqtyń 2029 jylǵa deıingi basym baǵyttaryn aıqyndaıtyn jol kartasy qabyldanady. Bul qujat ekijaqty baılanystardy, sonyń ishinde ekonomıkalyq yntymaqtastyqty damytýǵa negiz bolady, – dedi Jan-Lıýk Krıýıke Aqordada keńeıtilgen quramdaǵy kelissózde.
Sondaı-aq Belgııa men Qazaqstannyń kompanııalary, ýnıversıtetteri jáne túrli mekemeleri arasynda birqatar kelisimge qol qoıylady. Bul ekonomıkalyq, ǵylymı-bilim berý jáne gýmanıtarlyq baılanystardy odan ári nyǵaıtýǵa múmkindik beredi.
– 2027 jyly dıplomatııalyq qatynastarymyzdyń ornaǵanyna 35 jyl tolatynyn eskersek, bul jetistikter eki el arasyndaǵy seriktestiktiń berik ekenin kórsetedi. Sońǵy jyldary ekonomıkalyq baılanystarymyz aıtarlyqtaı nyǵaıdy. Sońǵy on jylda ekijaqty saýda kólemi úsh ese ósti, al Belgııanyń Qazaqstan ekonomıkasyna salǵan ınvestıtsııasy 10 mıllıard dollardan asty, – dedi belgııalyq mınıstr.
Ásirese eki el kólik-logıstıka, mańyzdy shıkizat túrleri, densaýlyq saqtaý, aýyl sharýashylyǵy jáne jańartylatyn energetıka salalaryndaǵy yntymaqtastyqty tereńdetýge zor múmkindik bary aıtyldy.
– Transkaspıı halyqaralyq kólik dálizi Eýropa men Ortalyq Azııa arasyndaǵy kólik qatynasyn damytýda strategııalyq mańyzǵa ıe, – dedi Jan-Lıýk Krıýıke.
Aıta keteıik, 11-14 qazan kúnderi Belgııalyqtar Koroli Fılıpp jáne Patshaıym Matıldanyń Qazaqstanǵa memlekettik sapary ótedi.
Sapar baǵdarlamasy tórt negizgi baǵytty qamtıdy. Olar – asa mańyzdy paıdaly qazbalar, jasandy ıntellekt, densaýlyq saqtaý, sondaı-aq tarıh pen mádenıet.
Búgin Qasym-Jomart Toqaev Belgııalyqtar Koroli Fılıpp pen Matılda patshaıymdy Aqordada qarsy aldy.
Óz kezeginde Belgııalyqtar Koroli Fılıpp pen Patshaıym Matılda sapardan erekshe áser alǵanyn aıtýda.
