Qazaqstandyqtar Qytaıdaǵy Azııa para oıyndarynyń saltanatty ashylýyna qatysty
Búgin Qytaıdyń Hanchjoý qalasyndaǵy «Úlken Lotos» olımpıada stadıonynda IV Azııa para oıyndarynyń ashylý saltanaty ótti, dep habarlaıdy Kazinform.
Týrızm jáne sport mınıstrliginen málim etkendeı, oıyndardyń ashylý rásiminde elimi Týyn paravoleıboldan Azııa chempıonatynyń kúmis júldegeri Janǵalı Súıeýov jáne paraústel tennısinen halyqaralyq jarystardyń chempıony Altynaı Erjanqyzy ustap shyqty.
Týrızm jáne sport mınıstri Ermek Marjyqpaev oıyndarǵa qatysýshylardy quttyqtap, sportshylarymyzdy qoldaýǵa shaqyrdy.
«Para sportshylardyń mundaı iri dodaǵa qatysýynyń ózi – úlken jeńis. Taǵdyrdyń tosyn synaǵyna synyp ketpeı, erik-jigeriniń, sportqa degen qushtarlyǵynyń arqasynda osyndaı dárejege jetip otyr», – dedi mınıstr.
Aıta keteıik, qazannyń 22-28 aralyǵynda ótetin sporttyq dodaǵa 43 memleketten 4 myńǵa jýyq sportshy qatysyp, 485 medal jıyntyǵyn sarapqa salady.
Baıraqty básekede 131 qazaqstandyq sporttyń 14 túrinen óner kórsetedi. Ulttyq qurama komandasyn IV Azııa Para oıyndaryna shyǵaryp salý rásimi 13 qazanda Almaty qalasynda ótken edi.
Eske salaıyq, Qytaıdyń Hanchjoý qalasynda HІH Azııa oıyndary 23 qyrkúıek - 8 qazan aralyǵynda ótti. Onda 30 sport túrinen 524 qazaqstandyq baq synap, nátıjesinde 80 medal jeńip aldy. Jalpykomandalyq esepte QR quramasy 11-orynǵa turaqtady.
Endi Azııa oıyndaryn 2026 jyly 19 qyrkúıek pen 4 qazan aralyǵynda Japonııanyń Nagoıa qalasy qabyldaıdy.
