Qazaqstandyqtar qytaı kólikterine shaǵymdanyp jatyr — mınıstrlik ne deıdi
ASTANA. KAZINFORM — Qazaqstandyqtar Qytaıdan ákelinetin avtokólikter klımatqa beıimdelmegen dep shaǵymdanyp jatyr.
Úkimet otyrysynan keıin ótken baspasóz máslıhatynda BAQ ókilderi Ónerkásip jáne qurylys vıtse-mınıstri Oljas Saparbekovke kelesi saýaldy qoıdy: «Qazaqstandyqtar qytaı avtokólikterine shaǵymdana bastady. Aıtýynsha, qytaılyq avtokólikter bizdiń klımatqa beıimdelmegen. Bul pikirmen kelisesiz be? Bolashaqta qazaqstandyq óndirýshiler qytaılyq avtokólikterdi nemese olardyń qosalqy bólshekterin qurastyrýy múmkin be?»
— Aldymen naqty qandaı avtokólikter týraly aıtylǵanyn anyqtaý kerek, ıaǵnı belgisiz jolmen ákelingen kólikter me, álde Qazaqstanda resmı túrde satyp alynǵan ba? Bıyl eki zaýytty iske qosý josparda bar, atap aıtqanda, Changan, Haval jáne Chery markalaryn shyǵarady. Zaýyt jaqyn arada iske qosylady, jobanyń qýattylyǵy jylyna 100 myńnan astam avtokólik. Ol jerde qytaı brendteriniń kólikteri óndiriledi jáne olardyń quramdas bólikterin jergiliktendirý de kózdelgen. Árbir óndirýshi belgili bir mindettemeni óz moınyna aldy (tehnologııalyq operatsııalar, protsester, qosalqy bólshekterdi jergiliktendirý boıynsha). Ótken jyly keıbir komponentter boıynsha jergiliktendirý bastaldy, aldaǵy ýaqytta plastıkalyq bólshekterdi, oryndyqtardy, mýltımedııalyq júıelerdi óndirý josparlanyp otyr, — dep jaýap berdi Ónerkásip jáne qurylys vıtse-mınıstri.
Sondaı-aq mınıstr orynbasarynan qytaılyq kólikter Qazaqstannyń klımatyna beıimdiligine qatysty jeke oıyn surady.
— Eger avtokólikterdi deldaldar ákelgen bolsa, onda ol Qazaqstan zańnamasy aıasynda qaralýy tıis. Bizde tehnıkalyq reglament talaptary bar jáne avtokólikter solarǵa sáıkes kelýi kerek. Ol kólikter qalaı ákelindi, qajetti qujattardy qalaı aldy, ol jaǵyn men aıta almaımyn. Al Qazaqstanda óndiriletin kólikter boıynsha talaptar bar jáne olar sáıkes keledi, — deıdi ol.
Aıta keteıik, Qazaqstanda avtokólikti memlekettik nómirimen birge satý múmkindigi berilmek.