Qazaqstandyqtar qajylyqqa barady: áýe kompanııalaryna qandaı talaptar qoıylady
ASTANA. KAZINFORM – Taıaý Shyǵystaǵy kúrdeli geosaıası jaǵdaıǵa qaramastan, otandastarymyz bıyl da qajylyqqa barady. Islam paryzdarynyń biri 15 mamyr men 5 maýsym aralyǵynda óteledi. Qazaqstandyqtardyń Saýd Arabııasyna qaýipsiz baryp-kelýi úshin qandaı jaǵdaı jasalatyny jóninde anyqtaǵan edik.
Qazaqstannyń avıatsııalyq ákimshiligi usynǵan málimetke saı, Saýd Arabııasynyń áýe keńistigi halyqaralyq reıster úshin ashyq. Biraq Taıaý Shyǵystaǵy keı elderde áli de shekteýler bar.
– Osyndaı jaǵdaıǵa baılanysty qazaqstandyq áýe kompanııalary marshrýttardy josparlaǵanda, syn-qaterlerdi eskerýi tıis, – delingen Qazaqstannyń avıatsııalyq kompanııasynyń saýalymyzǵa joldaǵan resmı jaýabynda.
Jolaýshy tasymaldaýshylarǵa naqty mindetter qoıylyp otyr. Olar tómendegi málimetterdi árdaıym baqylap, bilip, eskerýi kerek:
· Halyqaralyq uıymdardyń derekteri. Sonyń ishinde Halyqaralyq azamattyq avıatsııa uıymy (ICAO), Avıatsııalyq qaýipsizdik agenttigi eýropalyq odaǵy (EASA) jáne basqa da uıymdardyń málimetteri;
· Aeronavıgatsııalyq aqparat, sondaı-aq NOTAM (áýeaılaq ınfraqurylymynyń jaǵdaıy jáne ushý qaýipsizdigine yqtımal qaýipter týraly jedel habarlamalar);
· Memlekettik organdardyń aqparaty men ashyq derekkózderdegi málimetter.
Osyndaı talaptar oryndalsa, reısterdiń qaýipsizdigin baqylaýda ustaýǵa bolady ári halyqaralyq tájirıbege de saı keledi.
– Saýd Arabııasyna áýe reısteriniń marshrýty qaýipti aımaqtardy jáne jabyq áýe keńistikterin aınalyp ótý arqyly qurylady. Mundaı tásil halyqaralyq tájirıbede bar. Osy arqyly reısterdiń qaýipsizdigi qamtamasyz etiledi. Almaty – Djıdda/Medına, Astana – Djıdda/Medına, Shymkent — Djıdda/Medına baǵytyndaǵy tikeleı reıster joǵarydaǵy talaptar oryndalǵan jaǵdaıda ǵana júzege asady, – delingen habarlamada.
Sondaı-aq, avıatsııalyq ákimshiliktiń málimetinshe, Taıaý Shyǵystaǵy keı elderdiń áýe keńistigi jabyq kúıinde qalyp otyr. Jaǵdaı árdaıym baqylaýda. Qosymsha sheshimderdiń qabyldanýy áskerı-saıası ahýaldyń ózgerýine baılanysty.
Aıta keteıik buǵan deıin bıylǵy qajylyq maýsymy 15 mamyr – 5 maýsym aralyǵynda ótetinin jazǵanbyz.
