Qazaqstandyqtar qaı elderge saıahattaǵandy unatady

ASTANA. KAZINFORM – Ótken jyly 1 mln-nan astam Qazaqstan azamaty shetelge saıahattaǵan. Bul týraly Týrıstik qamqor qorynyń dırektory Asylhan Esilov aıtty.

— 2024 jyly rekordtyq kórsetkish tirkeldi, atap aıtqanda 1 mln-nan astam qazaqstandyq shetelge demalýǵa shyqqan. Ádettegideı alǵashqy orynda Túrkııa tur, ekinshi orynda – Mysyr eli, úshinshi orynda – Birikken Arab Ámirligi. Osy úsh el sońǵy birneshe jyl aldyńǵy úshtikte tur. 2023 jyly 847 myń adam, 2022 jyly 769 myń adam shetelge saıahattaǵan, - dedi ol Jibek Joly arnasyndaǵy «Búgin Live» baǵdarlamasynda. 

Sondaı-aq ol elimizde shetelge saıahattaýǵa attanǵan azamattardyń quqyǵyn qorǵaıtyn jańa júıe jumys isteıtinin atap ótti. 

— Qazirgi tańda áýe kemesin jaldaýshy 11, turaqty reıstermen jumys isteıtin 55 týroperator bar, ıaǵnı jalpy sany 66. Týroperatorǵa kepildik berý júıesiniń eki talaby bar: birinshi – banktik kepildik, ekinshi – ár týrıske týrkod berý mindeti. Ótkende eske alsaq, 2011-2015 jyldar aralyǵynda demalýǵa barǵan 20 myńnan astam qazaqstandyq shetelde qalyp qoıǵan. Ol kezde memleket qarajat bólip, olar elge oraldy. Týrkod – týrıstiń qaýipsizdik kepildigi. Birinshiden, týroperator bankrotqa ushyrasa, ekinshiden, týroperator óz mindetin oryndamasa ol kúshine enedi. Solaı týrıstiń quqyǵyn qorǵaýǵa kómektesedi, - dedi Asylhan Esilov. 

Aıta keteıik, buǵan deıin Memleket basshysy týrızmniń qarqyndy damýyna jol ashatyn baǵyttardy ataǵan edi.