Qazaqstandyqtar qaı elderge kóbirek saıahattaı bastady
ASTANA. KAZINFORM - Qazaqstandyqtardyń shetelde demalýǵa degen tańdaýy ózgerip keledi. Sońǵy bir jylda keıbir baǵyttarǵa suranys aıtarlyqtaı ósse, buryn tanymal bolǵan elderdiń ornyn Azııa baǵyttary basyp jatyr. Bul týraly Kazinform agenttiginiń resmı saýalyna bergen jaýabynda QR Týrızm jáne sport mınıstrligi Týrızm ındýstrııasy komıteti tóraǵasynyń orynbasary Aıdyn Qapashev málim etti.
2026 jylǵy jazǵy týrıstik maýsymda qazaqstandyqtar arasynda eń tanymal sheteldik baǵyttar qatarynda Vetnam, Mysyr, Taıland, Túrkııa, Qytaı jáne Maldıv Respýblıkasy bar.
Komıtettiń baǵalaýynsha, byltyrǵymen salystyrǵanda týrıstik naryqta birqatar ózgeris baıqalady.
— Keıingi bir jylda týrıster kóp tańdaıtyn baǵyttardyń reıtıngi ózgerdi. Máselen, qazirgi tańda Vetnam men Mysyrǵa suranys aıtarlyqtaı ósti, Qytaı vızasyz jáne tikeleı reısterdiń arqasynda pozıtsııasyn nyǵaıtty. Geosaıası jaǵdaıǵa baılanysty týrısterdiń bir bóligi BAÁ-den Azııa baǵyttaryna aýysty, — dedi spıker.
Onyń aıtýynsha, qazaqstandyqtardyń týrıstik baǵyt tańdaýyna birneshe faktor yqpal etip otyr.
— Atap aıtqanda, týrıster eń áýeli týrlardyń baǵasy men qoljetimdiligine, vızasyz rejımniń bolýyna, jańa áýe baǵyttarynyń ashylýyna, valıýta baǵamyna jáne álemdegi geosaıası ahýalǵa nazar aýdarady. Budan bólek, jaǵajaı demalysyna suranys pen maýsymdyq erekshelikter de tańdaý jasaýǵa áser etip jatyr, — dedi komıtet tóraǵasynyń orynbasary.
Mınıstrlik málimetinshe, dál osy faktorlardyń yqpalymen keıingi ýaqytta qazaqstandyq týrısterdiń qyzyǵýshylyǵy birtindep Azııa elderine aýyp keledi. Ásirese, Vetnam men Qytaıǵa suranystyń artýy osy úrdistiń aıqyn kórinisi bolyp otyr.
Eske salaıyq, buǵan deıin Vetnamda jańa onlaın tirkeý júıesi paıda bolǵany jóninde jazdyq.
