Qazaqstandyqtar qaýip-qaterge qaramastan Taıaý Shyǵysqa sapardan bas tartýǵa asyǵar emes

ASTANA. KAZINFORM - Taıaý Shyǵystaǵy geosaıası jaǵdaıdyń ýshyǵýyna qaramastan, Birikken Arab Ámirlikteri, Mysyr jáne Iordanııa sııaqty elderge baratyn týrlardan qazaqstandyq týrısterdiń bas tartý jaǵdaılary baıqalmaıdy.

Bul týraly «Týrıstik Qamqor» korporatıvtik qorynyń tóraǵasy Inna Reı málimdedi.

- Ázirge jaǵdaı ózgerissiz. Týrıster aǵyny aldaǵy ýaqyty azaıýy múmkin. Sebebi adamdar Taıaý Shyǵystaǵy jaǵdaıǵa báribir alańdaýly, — dedi Inna Reı.

Ol Qazaqstannan atalǵan óńir elderine jasalatyn týrlardy jappaı qaıtarý týraly habarlamalar ázirge túspegenin atap ótti.

-Týrıster saparlardyń merzimi men baratyn baǵytyna qatysty máselelerdi agenttermen ózara sheship jatqan bolýy múmkin. Sebebi bul másele boıynsha ázirge shaǵym túsken joq,- dedi maman.

Týrlardyń baǵasyna kelsek, olar ózgergen joq.

BAÁ men Mysyr baǵyttaryna sapar quny sol kúıi qalǵan. Alaıda jeke saıahatshylar úshin áýe bıletteriniń baǵasy ósken. Bul negizinen baǵyttardyń uzaryp, jolǵa ketetin ýaqyttyń artýyna baılanysty bolyp otyr.

Jaǵdaıdyń shıelenisýine baılanysty Qazaqstan Respýblıkasynyń Syrtqy ister mınıstrligi azamattarǵa Iran, Irak, Sırııa jáne Parsy shyǵanaǵyndaǵy qaýip deńgeıi joǵary ózge de birqatar elge barýdan bas tartýǵa keńes berdi. Alaıda Mysyr men BAÁ bul tizimde joq.

— Týrıstik agenttikter men týroperatorlar baǵyttardy ózderi retteıdi, bul rette olar Syrtqy ister mınıstrliginiń usynymdaryn negizge alady, — dep naqtylady qor tóraǵasy.

Inna Reıdiń aıtýynsha, geosaıası turaqsyzdyq jaǵdaıyndaǵy týrısterdi saqtandyrý máseleleri — saqtandyrý kompanııalarynyń óz qalaýy boıynsha sheshiletin sharýa.

2025 jyldyń jazǵy jáne kúzgi maýsymyna qatysty boljam jasaý ázirge erte.

— Jaǵdaı únemi ózgerip otyrady, sondyqtan Taıaý Shyǵys baǵyttaryna degen suranysqa naqty baǵa berý ázirge múmkin emes, — dep túıindedi Inna Reı.

Osyǵan deıin Týrızm mınıstrliginiń qazaqstandyq saıahatshylarǵa eskertý jasaǵany týraly jazdyq.