Qazaqstandyqtar Kaspi qosymshasy arqyly Qytaıda tólem jasaı alady
ASTANA. KAZINFORM — Qazaqstandyqtar endi Kaspi.kz mobıldi qosymshasy arqyly Qytaıda tólem jasaı alady.
Kaspi banktyń habarlaýynsha, Qytaıǵa kelgende qazaqstandyqtarǵa endi ózimen birge qolma-qol aqsha nemese karta ala kelýdiń qajeti joq.
Kaspi.kz mobıldi qosymshasynyń kómegimen qytaılyq dúkenderde, kafede, taksıde jáne Qytaıdaǵy basqa da 80 mıllıonnan astam orynda satyp alý aqysyn QR-kod arqyly tóleýge bolady.
Kaspi.kz basshysy ári negizin qalaýshylardyń biri Mıhaıl Lomtadzeniń aıtýynsha, bank qosymshasy AliPay+ kompanııasymen seriktestik ornatyp, ár qazaqstandyq úshin jańa servısti iske qosqan.
Endi qazaqstandyqtar Kaspi.kz mobıldi qosymshasymen Qytaıdaǵy saýda oryndaryndaǵy kez kelgen taýar aqysyn tóleı alady.
Qytaıdaǵy Ant International bas dırektory Venetsııa Lıdyń aıtýynsha, bul seriktestik qazaqstandyqtar úshin Qytaıdaǵy saıahat pen satyp alý sapasyn jaqsartady.
Aıta keteıik, AliPay — Qytaıda qolma-qol aqshasyz tólem jasaýǵa arnalǵan mobıldi qosymsha.
